कोभिड प्रकोप प्रभाव : अटो ग्वाङझाउ २०२२ स्थगित

विश्वकै ठूलो मध्ये एक मानिने चीनको प्रसिद्ध अटो शो ‘अटो ग्वाङझाउ २०२२’ स्थगित हुने भएको छ । आगामी नोभेम्बर १८ देखि २७ सम्म आयोजना हुने मिति पहिले नै तय भए पनि चीनमा फैलिरहेको कोभिड–१९ प्रकोपका कारण अटो शो स्थगित भएको हो ।

स्वास्थ्यलाई ध्यानमा राखेर विभिन्न रोग प्रतिरोधक कार्य गर्नु पर्ने सरकारी निकायको अनुरोधलाई स्वीकार गर्दै अटो शो स्थगित गरिएको आयोजकको भनाइ छ । यद्यपि उक्त अटो शोको नयाँ मिति भने तोकिएको छैन ।

क्योडो न्युजका अनुसार अक्टोबर २४ यता चीनका २८ सहरका २० करोड भन्दा बढी नागरिक कुनै न कुनै प्रकारको लकडाउनका कारण प्रभावित भएका छन् ।

कोभिडका कारण चीनमा टेस्ला, फक्सवागन, टोयोटा र अन्य कम्पनीहरुको उत्पादन पनि प्रभावित भएको छ । चीनको इलेक्ट्रिक कार निर्माता कम्पनी नियोले आफ्नो हेफेईमा रहेको प्लान्टको कार्य समेत केही समयलाई रोकेको यही साता घोषणा गरेको छ ।

अटो ग्वाङझाउ २०२२ स्थगित भएसँगै विभिन्न कम्पनीहरुले सार्वजनिक गर्ने भनिएका नयाँ सवारी साधन समेत प्रभावित हुने भएका छन् । टोयोटाले सार्वजनिक गर्ने भनिएको बीजेड३ र ८०० किलोमिटर रेन्ज दाबी गरिएको एमजी साइबरस्टरको सार्वजनिकीकरण समेत पछि सर्ने भएको छ ।