एथरको अर्को सफलता, ८ लाख बिक्रीको माइलस्टोन पार

काठमाडौं–एथरले ८ लाख युनिट खुद्रा बिक्रीको महत्वपूर्ण उपलब्धि हासिल गरेको छ ।

सन् २०१८ देखि बजारमा प्रवेश गरेको यस ब्रान्ड ओला, टिभिएस र बजाज जस्ता स्थापित ब्रान्डहरूपछि यो सफलता चुम्ने चौथो भारतीय ब्रान्ड बनेको छ ।

विशेषगरी सन् २०२५ देखि कम्पनीको बिक्रीमा तीव्र उछाल आएको जनाइएको छ । जनवरी २०२५ देखि सेप्टेम्बर २०२६ को छोटो अवधिमा मात्रै ४ लाख ७५ हजार युनिट बिक्री भएको छ, जुन कम्पनीको अहिलेसम्मको कुल बिक्रीको ५९ प्रतिशत हिस्सा हो ।

सन् २०२३ मा १ लाख युनिटको खुद्रा बिक्री पार गरेको एथरले सन् २०२४ मा १ लाख ३६ हजार युनिट स्कुटर बिक्री गरेको थियो । त्यसैगरी, मार्च २०२६ मा ३६ हजार ६३३ युनिट बिक्री गर्दै कम्पनीले आफ्नो इतिहासमै सबैभन्दा बढी मासिक बिक्रीको रेकर्ड समेत बनाएको थियो ।

कम्पनीको पारिवारिक स्कुटर रिज्टा र हालै सार्वजनिक गरिएको नयाँ कोनार्क मोडलका कारण आगामी दिनमा बिक्रीको गति अझै बढ्ने अनुमान गरिएको छ ।

कम्पनीका अनुसार, नयाँ कोनार्क मोडलले प्रतिस्पर्धा बढाउनुका साथै कम्पनीको नाफा दरलाई पनि सुदृढ बनाउँदै लगेको छ । नयाँ मोडलहरूको उच्च मागसँगै एथरले यो वर्षमात्रै ३ लाख ५० हजार युनिट स्कुटर बिक्री गर्ने लक्ष्य राखेको छ ।