यस्तो हुनेछ अप्रिलियाको इलेक्ट्रिक बाइक, कन्सेप्ट सार्वजनिक

विभिन्न कम्पनीहरुले बजारमा इलेक्ट्रिक सवारी साधन ल्याउने कार्य गरिरहेका छन् । यसै सन्दर्भमा अप्रिलिया पनि यो क्षेत्रमा प्रवेश गरेको छ ।

अप्रिलियाले फ्युचर इलेक्ट्रिक मोटरसाइकलको आइडिया सार्वजनिक गरेको छ, जसलाई ‘इलेक्ट्रिका’ नाम दिइएको छ । क्लासिक कन्सेप्ट फेसनमा भएको सो इलेक्ट्रिक मोटरसाइकलको स्पेसिफिकेसन भने सार्वजनिक गरिएको छैन । यद्यपि सबैको पहुँचमा पुग्ने फन मोटरसाइकल हुने र भर्खरै बाइक चलाउन थालेका नयाँ राइडरलाई यसले लक्ष्यित गर्ने कम्पनीको भनाइ छ ।

यो मोटरसाइकल हलुका हुनुका साथै सानो समेत हुनेछ । ह्यान्डल बारबाटै फ्रन्ट र रियर ब्रेक कन्ट्रोल गर्न सकिने यो मोटरसाइकललाई भर्खरै स्कुटर वा साइकल चलाएकाहरुले निकै नै रुचाउने अपेक्षा गरिएको छ ।

होचो सिट र अपराइड राइडिङ पोजिसन समेत भएकाले नयाँ राइडरका लागि यो चलाउन सहज हुनेछ । यसको डिजाइन पनि लोभलाग्दो छ । यो ट्रिम र एंगुलर बाइक हुनेछ । यसमा भएको ट्रिपल हेडलाइट क्लस्टर पनि आकर्षक हुनेछ ।

यद्यपि अप्रिलियाले यो मोटरसाइकल बिक्रीका लागि कहिले उपलब्ध हुन्छ भन्ने वारेमा केही बताएको छैन । अहिले कन्सेप्ट भर्सन मात्र सार्वजनिक भएकाले प्रोडक्सन भर्सन आउनका लागि लामै समय कुर्नु पर्ने हुन सक्छ ।