भारत र इजरायलले आल्मुनियम एयर ब्याट्री उत्पादन गर्ने, के हो आल्मुनियम एयर ब्याट्री ? कसरी गर्छ काम ?

भारत र इजरायलले इलेक्ट्रिक सवारी साधनका लागि अत्याधुनिक आल्मुनियम एयर ब्याट्री उत्पादन गर्न साझेदारी गरेका छन् । सो साझेदारीले भारतमा ब्याट्रीको आयातमा पनि कमी आउने र ऊर्जा क्षेत्रमा आत्मनिर्भर हुने अपेक्षा गरिएको छ ।

इजरायली कम्पनी फिनर्जीले आल्मुनियम एयर ब्याट्री विकास गरेको हो । सो ब्याट्री हल्का र उच्च ऊर्जा क्षमताको हुनेछ । सो ब्याट्रीले अन्य ब्याट्रीको तुलनामा बढी रेन्ज दिनेछ ।

आल्मुनियम एयर ब्याट्री छिटो चार्ज गर्न सकिन्छ र यसको लागि महँगो चार्जिङ नेटवर्कको आवश्यकता पर्दैन । आल्मुनियम एयर ब्याट्रीले ईभीलाई अझ सुविधाजनक बनाउने र शून्य उत्सर्जन गतिशीलतालाई गति दिने अपेक्षा गरिएको छ ।

ब्याट्रीमा रहेको आल्मुनियम हाइड्रोक्साइडलाई रिसाइकल गर्न सकिन्छ । हाल सो टेक्नोलोजीको परीक्षण भइरहेको छ ।

आल्मुनियम एयर ब्याट्री कारको लागि नयाँ टेक्नोलोजी हो । यसमा आल्मुनियमले इन्धनको रूपमा काम गर्छ, जसले इलेक्ट्रोलाइटको माध्यमबाट हावासँग प्रतिक्रिया गरेर विद्युतीय शक्ति उत्पन्न गर्छ । यसको ट्रिप रेन्ज पनि बढी छ ।

यसको ऊर्जा घनत्व लिथियम–आयोन ब्याट्री भन्दा धेरै अधिक छ । सो ब्याट्री धेरै हल्का छ भने आल्मुनियम लिथियम भन्दा सस्तो र प्रचुर मात्रामा पाइने धातु पनि हो ।