२९ वर्ष पुरानो यो बाइकले तोड्यो सबै कीर्तिमान, यस्तो छ विशेषता

हिरो स्प्लेन्डर भारतमा सबैभन्दा बढी बिक्री हुने कम्युटर बाइक हो । २०२२ मा सबैभन्दा धेरै बिक्री हुने बाइकको सूचीमा स्प्लेन्डर पहिलो नम्बरमा थियो । २९ वर्षअघि लन्च गरिएको स्प्लेन्डर गत वर्ष २६ लाख ६५ हजार ३८६ जनाले खरिद गरेका थिए ।

हिरो स्प्लेन्डर बाइक सन् १९९४ मा सीडी१०० को नयाँ भर्सनको रूपमा लन्च गरिएको थियो । सन् २०११ मा स्प्लेन्डर पहिलो पटक पावर स्टार्ट सिस्टम र नयाँ इन्जिनको साथ लन्च गरिएको थियो । सो बाइक हाल हिरो स्प्लेन्डर प्लस, हिरो सुपर स्प्लेन्डर र हिरो स्प्लेन्डर प्लस एक्सटेक ३ मोडलमा उपलब्ध छ ।

माइलेज
हिरो स्प्लेन्डर पछि अन्य बाइकमा पनि माइलेजमा विशेष चासो राख्न थालियो । हिरो स्प्लेन्डरले अझ पनि ६० किलोमिटरको माइलेज दिन्छ । तर, कम्पनीले यो भन्दा बढी माइलेज दिने दाबी गरेको छ ।

इन्जिन
सुपर स्प्लेन्डरमा १२४.७ सीसी, स्प्लेन्डर प्लस र एक्सटेकमा ९७.२ सीसीको फोर स्ट्रोक इन्जिन उपलब्ध छ । बाइकको बीएस६ अनुरूप ९७.२ सीसी फ्युल इन्जेक्टेड इन्जिनले ७.९ बीएचपीको पावर र ८.०५ एनएम टर्क उत्पादन गर्छ । सो बाइक खराब सडक, गाउँ र सामान ओसारपसारमा सजिलै प्रयोग गर्न सकिन्छ ।

मजबुती
स्प्लेन्डर एकदमै रफ र टफ बाइक हो । यसको आयु धेरै लामो छ । अहिले पनि २० देखि २५ वर्ष पुराना स्प्लेन्डर सडकमा देखिने गरेको छ । यो बाइक ग्रामीण क्षेत्रमा धेरै बिक्री हुन्छ । बाइकलाई थप व्यवहारिक बनाउन स्प्लेन्डरले ग्रयाब ह्यान्डल र साइड हिन्ज लगेज माउन्ट गर्ने जस्ता फिचर समावेश गरिएको छ ।

मेन्टिनेन्स
हिरो स्प्लेन्डर सर्भिसिङ गर्न कम खर्च लाग्छ । बाइकका पार्टपुर्जाहरू सजिलै उपलब्ध हुन्छ । साथै बाइकको रिसेल भ्याल्यु पनि निकै उच्च छ ।

मूल्य
हिरो स्प्लेन्डर बीएस६ मोडलको मूल्य ७३ हजार भारुबाट सुरु हुन्छ । सो बाइक आई३एस स्टार्ट–स्टप सिस्टम, कम्बाइन्ड ब्रेकिङ र नयाँ ग्राफिक्सको साथमा उपलब्ध छ ।