१५ हजार बढेर नेपाल आउने भयो आरसी २०० को नयाँ मोडल, आइतबारदेखी शोरुममा उपलब्ध हुने

केटिएम आरसी २०० को २०२२ मोडल २ दिनपछि नेपाल आउने भएको छ । आइतबारदेखी शोरुममा उपलब्ध हुने यो बाइकको मूल्य ६ लाख ७४ हजार ९ सय रुपैयाँ पर्ने आधिकारिक बितरक हंसराज हुलासचंद एन्ड कम्पनी स्रोतले बताएको छ । जुन यसअघि कारोबार भैरहेको पुरानो मोडलको तुलनामा १५ हजार रुपैयाँले बढी हो । पुरानो मोडललाई कम्पनीले ६ लाख ५९ हजार ९ सय रुपैयाँमा बिक्री गर्दै आएको थियो ।

पुरानो मोडलमा १६ भन्दा बढी अपडेट गरेर ल्याइएको यो नयाँ मोडलको इन्जिन र पावरट्रेनमा भने कुनै फेरबदल गरिएको छैन । हलुका फ्रेममा आधारित रहि निर्माण गरिएको यो बाइकमा अपडेट गरिएको एलसिडी इन्स्ट्रुमेन्ट क्लस्टर थप गरिएको छ । यो नयाँ बाइकको ह्यान्डल बारलाई राइडरले आफू अनुकुल एड्जस्ट गर्न सक्नेछन् ।

यसैगरी यसमा नयाँ एलइडी हेड लाइट, पहिलेका भन्दा अझै सार्प टेलगेड डिजाइन र हाई–स्ट्रेन्थ ह्विल दिइएको छ । यो नयाँ बाइकमा केटिएमले सुपरमोटो एबिएस समेत थप गरेको छ । जुन यसअघिका उच्च मोडलमा मात्र उपलब्ध रहँदै आएको थियो ।

आरसी २०० को यो नयाँ मोडलमा १३.७ लिटर क्षमताको फ्युल ट्यांक जडान गरिएको छ । जुन यसअघिको मोडलमा जम्मा ९.५ लिटरमात्र रहेको थियो । यसको साथै यो बाइकमा ठूलो एयरबक्स, नयाँ स्टिफर, हलुका स्प्लिट स्टिल फ्रेम, नयाँ कर्भड रेडियटर र लेजर टेक्स्चर सहितको अनौठो विन्डस्क्रिन जस्ता फिचर्स थप गरिएको छ ।

यो बाइकमा पुरानै मोडलमा उपलब्ध गराइएको २ सय सिसी क्षमताको लिक्वड कुल्ड सिंगल सिलिन्डर इन्जिनलाई निरन्तरता दिइएको छ । जसको अधिकतम पावर २४.६ बिएचपी र टर्क १९.२ एनएम रहेको छ ।