मनाङ मर्स्याङदी क्लबको मुख्य प्रायोजक फेरि पनि टोयोटा, भयो सम्झौता

काठमाडौं – टोयोटाले नेपाली फुटबल टिम मनाङ मर्स्याङदी क्लबलाई प्रायोजन गर्ने भएको छ । नेपालका लागि टोयोटाको आधिकारिक वितरक युनाइटेड ट्रेडर्स सिन्डिकेट (यूटीएस) ले क्लबको मुख्य प्रायोजकवापत दुई वर्षका लागि २० लाख रुपैयाँ प्रदान गर्नेछ ।

यस सम्बन्धी सम्झौता पत्रमा यूटीएसका बिजनेस रिसर्च एनालिस्ट सुर्यांश वैद्य र मनाङ मर्स्याङदी क्लबका महासचिव तेन्जिङ गुरुङ बीच हस्ताक्षर सम्पन्न भएको छ ।

खेलकुद र अटोमोबाइल क्षेत्र देशकै ठूलो उद्यम भएको र यसमा सरकारी लगानी तथा चासोको पनि आवश्यकता रहेको कुरालाई प्रस्ट्याउन समेत यो प्रायोजनले भूमिका खेल्ने यूटीएसका सुर्यांश वैद्यले बताए ।

टोयोटाले यस अघि पनि क्लबलाई प्रायोजन गर्दै आएको थियो । सोही साथलाई सुदृढ गर्नका लागि थप दुई वर्ष प्रायोजन गरेको बताइएको छ ।