टीभीएसको नयाँ आरटीआर १२५ एलसी सार्वजनिक

काठमाडौं–टीभीएस मोटरले इटालीको मिलानमा आयोजित २०२६ मिलान मोटरसाइकल शो (एक्मा २०२६) मा नयाँ मोटरसाइकल आरटीआर १२५ एलसी सार्वजनिक गरेको छ ।

कम्पनीले युरोपेली बजारलाई लक्षित गर्दै सार्वजनिक गरेको यो मोटरसाइकल ए१ लाइसेन्स क्याटेगोरीअन्तर्गत पर्छ ।

आरटीआर १२५ एलसी टीभीएसको युरोपेली पोर्टफोलियोमा सबैभन्दा सानो पर्फर्मेन्समा आधारित मोटरसाइकल हो । यो मोडल आरटीआर ३१०, आरआर ३१०, रोनिन र आरटीएक्स ३०० भन्दा तल रहनेछ ।

एग्रेसिभ डिजाइनमा तयार पारिएको यस मोटरसाइकलमा अग्लो पारदर्शी विन्डस्क्रिन, आयताकार एलईडी हेडलाइट र एलईडी डीआरएल दिइएको छ । यसमा आकर्षक कलर कम्बिनेसन, स्कल्प्टेड फ्युल ट्यांक, स्प्लिट सिट र स्प्लिट टेलल्याम्प डिजाइन पाउन सकिन्छ ।

१२५ सीसीको फोर–भल्भ, लिक्विड कुल्ड डीओएचसी इन्जिन जडान गरिएको यस मोटरसाइकलको पावर १५ बीएचपी र टर्क १२ एनएम रहेको छ । यसमा ६ स्पिड गियरबक्ससँगै असिस्ट एन्ड स्लिपर क्लच समेत उपलब्ध छ ।

अगाडि ४१ एमएमको केवाईबी यूएसडी फर्क र पछाडि एड्जस्ट गर्न मिल्ने मोनोशक सस्पेन्सन दिइएको यस मोटरसाइकलमा ब्रेकिङका लागि अगाडि ३०० एमएम र पछाडि २४० एमएमको बाइब्रे डिस्क ब्रेक प्रयोग गरिएको छ ।

बाइकमा ब्लुटुथ कनेक्टिभिटी, टर्न बाइ टर्न नेभिगेसन र फुल स्क्रिन म्याप मिररिङ सपोर्ट गर्ने ५ इन्चको टीएफटी डिस्प्ले उपलब्ध छ ।