भारतमा ईभीको माग उच्च, उत्पादन बढाउनुपर्ने दबाबमा कम्पनी

काठमाडौं–भारतमा विद्युतीय सवारीसाधन (ईभी) को बजार हिस्सा तीव्र गतिमा बढ्दै जाँदा उत्पादक कम्पनीहरूलाई उत्पादन क्षमता विस्तार गर्न दबाब परेको छ ।

बढ्दो माग, आपूर्ति शृंखलामा देखिएको अवरोध र सीमित मौज्दातका कारण ग्राहकलाई समयमै गाडी उपलब्ध गराउन कम्पनीहरूलाई चुनौती थपिएको हो ।

भारतको बाहन तथ्यांकअनुसार २०२६ को सेप्टेम्बरमा कुल सवारीसाधन बजारमा ईभीको हिस्सा १०.७ प्रतिशत पुगेको छ । यस अवधिमा प्यासेन्जर भेहिकल दर्तामा विद्युतीय कारको हिस्सा ८.५ प्रतिशत रहेको छ । त्यस्तै, विद्युतीय दुईपांग्रेको हिस्सा ११.६ प्रतिशत र तीनपांग्रेको हिस्सा ६४.९ प्रतिशत पुगेको छ ।

भारतको ईभी बजारमा करिब ४० प्रतिशत हिस्सा ओगटेको टाटा मोटर्स प्यासेन्जर भेहिकल्सले सन् २०२६ को फेब्रुअरीयता बुकिङ करिब २.५ गुणाले बढेको जनाएको छ । पन्च ईभी र नेक्सन ईभीको लोकप्रियताका कारण माग बढेको कम्पनीले दोस्रो त्रैमासिकमा ईभी उत्पादन करिब ४० प्रतिशतले वृद्धि गरेको थियो ।

उक्त अवधिमा कम्पनीले ४७ हजारभन्दा बढी गाडी बिक्री गरेको छ । तर, उत्पादन बढाउँदा पनि मागअनुसार आपूर्ति गर्न सकेको छैन । कम्पनीले सन् २०२७/२८ सम्म मासिक उत्पादन क्षमता १ लाख युनिट पु-याउने लक्ष्य राखेको छ ।

त्यस्तै, मारुती सुजुकीले गुजरातको हान्सलपुरमा ईभी उत्पादनका लागि छुट्टै प्लान्ट सञ्चालनमा ल्याएको छ । उक्त प्लान्टको वार्षिक उत्पादन क्षमता २ लाख ५० हजार युनिट रहेको छ । यहाँ कम्पनीको विद्युतीय एसयूभी ई–भिटारा उत्पादन भइरहेको छ ।

विद्युतीय स्कुटर बजारमा पनि उत्पादन क्षमता विस्तारको दबाब देखिएको छ । एथर इनर्जीले आपूर्ति समस्याका कारण आफ्नो इन्ट्री लेभल कोनार्क भेरियन्टको सार्वजनिक गर्ने योजना पछाडि सारेको छ ।

केही बजारमा डिलरहरूसँग एक साताभन्दा कम समयलाई पुग्ने स्टक रहेको र ग्राहकले दुई महिनाभन्दा बढी समय कुर्नुपर्ने अवस्था आएको छ । कम्पनीले आफ्ना दुई उत्पादन केन्द्रबाट वार्षिक उत्पादन क्षमता २ लाख २५ हजार युनिटले बढाउने योजना बनाएको छ ।

हिरो मोटोकर्पले आर्थिक वर्ष २०२६÷२७ को सुरुवातमा मासिक करिब १५ हजार रहेको ईभी उत्पादन क्षमता सोही आर्थिक वर्षको अन्त्यसम्म ४५ हजार युनिट पु-याउने लक्ष्य राखेको छ । कम्पनीका डिलरमा बिक्रीका लागि उपलब्ध स्टक घटेर करिब तीन दिनलाई पुग्ने अवस्थामा पुगेको छ ।

त्यस्तै, बजाज अटोले आफ्नो चेतक विद्युतीय स्कुटरको मासिक उत्पादन क्षमता आर्थिक वर्ष २०२६/२७ को अन्त्यसम्म ८० हजार युनिट पु-याउने योजना बनाएको छ । टीभीएस मोटरले पनि सन् २०२७ को मध्यसम्म विद्युतीय दुईपांग्रे र तीनपांग्रे सवारीसाधनको उत्पादन क्षमता १५ लाख युनिटले वृद्धि गर्न लगानी गर्ने प्रतिबद्धता जनाएको छ ।

ईभीको बढ्दो बजार हिस्सा र निरन्तर मागलाई सम्बोधन गर्न उत्पादक कम्पनीहरू उत्पादन क्षमता विस्तारसँगै ब्याट्री तथा अन्य आवश्यक कच्चा पदार्थको आपूर्ति सुनिश्चित गर्ने रणनीतिमा जुटेका छन् ।