होन्डा एलिभेट फेसलिफ्ट र हुन्डाई क्रेटाको इन्जिन, माइलेज र फिचरमा यस्तो छ भिन्नता

होन्डा एलिभेट फेसलिफ्ट र हुन्डाई क्रेटाबीच प्रतिस्पर्धा थप रोचक बनेको छ। होन्डा एलिभेटको फेसलिफ्ट हालै मात्र भारतमा लन्च भएको हो । नेपालमा केही समय पछि मात्र उपलब्ध हुनेछ । आकर्षक डिजाइन, आधुनिक प्रविधि, आरामदायी क्याबिन र सेफ्टी फिचरका कारण यी दुवै एसयूभी ग्राहकको रोजाइमा पर्दै आएका छन्। तर, इन्जिन विकल्प, ट्रान्समिसन, सेफ्टी फिचर र मूल्यका आधारमा यी दुई गाडीमा केही भिन्नताहरु छन्।

आकारका हिसाबले होन्डा एलिभेटको लम्बाइ ४३१२ एमएम, चौडाइ १७९० एमएम र उचाइ १६५० एमएम छ। यसको ह्विलबेस २६५० एमएम रहेको छ। हुन्डाई क्रेटाको लम्बाइ ४३३० एमएम, चौडाइ १७९० एमएम, उचाइ १६३५ एमएम र ह्विलबेस २६१० एमएम छ। यसमा क्रेटा १८ एमएम लामो छ भने एलिभेट १५ एमएम अग्लो छ। पाङ्ग्राको आकारमा भने क्रेटामा १८ इन्च र एलिभेटमा १७ इन्चका अलोय ह्विल उपलब्ध छ।

होन्डा एलिभेटमा १.५ लिटरको नेचुरली एस्पिरेटेड पेट्रोल इन्जिन जडान गरिएको छ, जसले ११९ एचपी पावर र १४५ एनएम टर्क उत्पादन गर्छ। हुन्डाई क्रेटामा भने १.५ लिटरको नेचुरली एस्पिरेटेड पेट्रोल इन्जिन उपलब्ध छ, जसले ११३ एचपी पावर र १४४ एनएम टर्क उत्पादन गर्छ। हुन्डाई क्रेटा पेट्रोल इन्जिन बाहेक १.५ लिटर डिजेल इन्जिन र १.५ लिटर टर्बो पेट्रोल इन्जिन पनि उपलब्ध छ । डिजेल इन्जिनले ११४ एचपी पावर र २५० एनएम टर्क उत्पादन गर्छ भने टर्बो पेट्रोल इन्जिनले १५७.८ एचपी पावर र २५३ एनएम टर्क प्रदान गर्छ।

होन्डा एलिभेटमा ६ स्पिड म्यानुअल र सीभीटी अटोमेटिक गियरबक्स उपलब्ध छ । हुन्डाई क्रेटामा भने ६ स्पिड म्यानुअल, सीभीटी, ६ स्पिड टर्क कन्भर्टर अटोमेटिक र ७ स्पिड ड्युअल क्लच ट्रान्समिसनलगायतका विकल्प उपलब्ध छ।

होन्डा एलिभेट फेसलिफ्टमा फ्रन्ट र रियर सिटमा भेन्टिलेसन र वायरलेस एन्ड्रोइड अटो र एप्पल कारप्ले जस्ता फिचर प्रदान गरिएको छ । साथै यसमा सिंगल पेन सनरुफ पनि उपलब्ध छ । हुन्डाई क्रेटामा प्यानोरामिक सनरुफ, ८ वे पावर एडजस्टेबल प्यासेन्जर सिट, रिक्लाइनिङ सुविधा, पछाडिका सनशेड र फुल डिजिटल ड्राइभर डिस्प्ले जस्ता फिचर उपलब्ध छ । यसमा टायर प्रेसर मोनिटरिङ सिस्टम पनि दिइएको छ। एलिभेटमा भने ४ वे पावर एडजस्टेबल प्यासेन्जर सिट र फ्रन्ट फग ल्याम्प उपलब्ध छ । इलेक्ट्रोनिक पार्किङ ब्रेक र चारवटै पाङ्ग्रामा डिस्क ब्रेकजस्ता फिचर दिइएको छ ।

सेफ्टीका लागि दुवै एसयूभीमा एडास उपलब्ध छ । एलिभेटको एडास सिस्टम क्यामेरामा आधारित रहेको छ भने क्रेटामा क्यामेरा र राडार दुवै प्रयोग गरिन्छ।

होन्डा एलिभेट फेसलिफ्टमा फ्रन्ट र रियरका सिटमा भेन्टिलेसन फिचर उपलब्ध छ भने हुन्डाई क्रेटाले प्यानोरामिक सनरुफ, डिजेल इन्जिन र टर्बो पेट्रोल इन्जिनको विकल्प प्रदान गर्छ। हुन्डाई क्रेटाको १० लाख ९१ हजार भारुबाट सुरु हुन्छ भने होन्डा एलिभेट फेसलिफ्टको मूल्य ११ लाख ८० हजारदेखि १८ लाख ४० हजार भारुसम्म छ।