किया ईभीमा १५ वर्ष र असीमित किलोमिटरको लाइफटाइम ब्याट्री वारेन्टी

काठमाडौँ–किया इन्डियाले आफ्नो विद्युतीय गाडी क्यारेन्स क्ल्याभिस ईभीका लागि १५ वर्ष वा असीमित किलोमिटरसम्म लागू हुने लाइफटाइम ब्याट्री वारेन्टीको घोषणा गरेको छ ।

कम्पनीका अनुसार यो वारेन्टी अगस्ट १, २०२६ देखि बिक्री भएका गाडीहरूमा लागू हुनेछ । यो सुविधा मुख्यतया व्यक्तिगत प्रयोजनका लागि गाडी दर्ता गर्ने र पहिलो ग्राहकका लागि मात्र उपलब्ध गराइने जनाइएको छ ।

यदि गाडी दोस्रो व्यक्तिलाई बिक्री गरिएमा वारेन्टी अवधि घटेर ८ वर्ष वा १ लाख ६० हजार किलोमिटरमा सीमित हुनेछ भने व्यावसायिक प्रयोजनका गाडीमा यो वारेन्टी लागू हुने छैन ।

यसअघि नै गाडी खरिद गरिसकेका पुराना ग्राहकहरूले पनि ३ हजार ४०० भारु थप शुल्क बुझाएर यो लाइफटाइम ब्याट्री वारेन्टी प्राप्त गर्न सक्ने सुविधा दिइएको छ ।

यो गाडी ४२ किलोवाट आवर (४०४ किमी रेन्ज) र ५१.४ किलोवाट आवर (४९० किमी रेन्ज) गरी दुईवटा ब्याट्री प्याक विकल्पमा उपलब्ध छ ।