प्रि–सेल्सको ७२ घण्टामै ३० हजार बढी बुकिङ भएको आर्कफक्स अल्फा टी७ सार्वजनिक हुँदै, आउन सक्छ नेपाल

चीनको बीएआईसी समूहअन्तर्गतको विद्युतीय सवारीसाधन ब्रान्ड आर्कफक्सले आगामी सेप्टेम्बर १६ मा नयाँ एसयूभी अल्फा टी७सार्वजनिक गर्ने भएको छ।

यद्यपि आर्कफक्सले आफ्नो आधिकारिक माध्यमबाट भने अहिलेसम्म सार्वजनिक मिति घोषणा गरिसकेको छैन। तर कम्पनीले चिनियाँ सामाजिक सञ्जाल वेइबोमार्फत देशभरका डिलरमा अल्फा टी७ का पहिलो लट पुगिसकेको जानकारी दिएको छ।

अल्फा टी७ को प्रि–सेल्स अगस्ट २६ देखि सुरु भएको थियो। यसको अनुदानपछिको मूल्य १ लाख ३७ हजार ८०० युआनदेखि १ लाख ७४ हजार ८०० युआनसम्म तोकिएको छ। प्रि–सेल्स सुरु भएको ७२ घण्टामै यसका लागि ३० हजारभन्दा बढी बुकिङ प्राप्त भएको आर्कफक्सले जनाएको थियो।

मध्यमदेखि ठूलो आकारको एसयूभीका रूपमा विकास गरिएको अल्फा टी७ ९ वटा भेरियन्टमा उपलब्ध हुनेछ। यसमध्ये चारवटा रेन्ज एक्सटेन्डेड र पाँचवटा ब्याट्री इलेक्ट्रिक संस्करण रहेका छन्।

चीनको बजारमा २ लाख युआनभन्दा कम मूल्यका एसयूभीबीच प्रतिस्पर्धा तीव्र भइरहेका बेला अल्फा टी७ को मूल्यलाई निकै प्रतिस्पर्धी मानिएको छ। ठूला आकारका गाडी, उन्नत चालक सहायता प्रणाली र उच्च भोल्टेज फास्ट चार्जिङजस्ता प्रविधिमार्फत चिनियाँ कम्पनीहरूले परिवार लक्षित ग्राहकलाई आकर्षित गर्ने प्रयास गरिरहेका छन्।

अल्फा टी७ को लम्बाइ ५०२० एमएम रहेको छ भने ह्विलबेस ३०४० एमएम छ। कुपे शैलीको एसयूभी डिजाइनमा तयार गरिएको यसमा पछाडिको बुट स्पेस ६४५ लिटर रहेको छ। पछाडिका सिट फोल्ड गर्दा यो क्षमता बढेर १ हजार ८४५ लिटरसम्म पुग्छ।

यसका सबै ब्याट्री इलेक्ट्रिक भेरियन्टमा ८०० भोल्टको विद्युतीय प्लेटफर्म र २२७ किलोवाट क्षमताको मोटर प्रयोग गरिएको छ। इन्ट्री लेभलको ६५० प्लस संस्करणमा ७५.४ किलोवाट आवरको ब्याट्री रहेको छ, जसले सीएलटीसी मापदण्डअनुसार ६५० किलोमिटरसम्मको रेन्ज दिने दाबी गरिएको छ।

अन्य ब्याट्री इलेक्ट्रिक संस्करणमा भने ८४.८ किलोवाट आवरको ब्याट्री प्रयोग गरिएको छ। यी संस्करणले सीएलटीसी मापदण्डअनुसार ७१५ किलोमिटरसम्मको रेन्ज प्रदान गर्नेछन्।

अल्फा टी७ का चारवटा रेन्ज एक्सटेन्डेड संस्करणमा १.५ लिटरको रेन्ज एक्सटेन्डर इन्जिन, २०० किलोवाटको इलेक्ट्रिक मोटर र ४३.९ किलोवाट आवरको ब्याट्री प्रयोग गरिएको छ।

यस संयोजनले सीएलटीसी मापदण्डअनुसार ब्याट्रीको शक्तिमा मात्र ३२० किलोमिटरसम्म यात्रा गर्न सक्नेछ। इन्जिन र ब्याट्रीको संयुक्त प्रयोगबाट यसको कुल रेन्ज १ हजार ३१५ किलोमिटरसम्म पुग्ने दाबी गरिएको छ।

अल्फा टी७ को प्रमुख आकर्षणमध्ये प्रो ड्राइभर असिस्टेन्स सिस्टम पनि एक हो। कम्पनीले यसमा विभिन्न आपूर्तिकर्ताबाट प्राप्त प्रविधि प्रयोग गरेको छ।

यसका केही भेरियन्टमा हुवावे किआन्कुन एडीएस ५ प्रो ड्राइभर असिस्टेन्स सिस्टम उपलब्ध हुनेछ। उक्त प्रणालीमा लिडारसहित २७ वटा सेन्सर प्रयोग गरिएको छ।

तर एडीएस ५ प्रो सबै भेरियन्टमा उपलब्ध भने छैन। कम्पनीको आधिकारिक विवरणअनुसार किआन्कुन नाम भएका चारवटा भेरियन्टमा एडीएस ५ प्रो र क्याबिनमा जडान गरिएको लिडार उपलब्ध हुनेछ।

अन्य केही भेरियन्टमा बीएआईसीको आफ्नै युआनजिङ ड्राइभर असिस्टेन्स सिस्टम प्रयोग गरिएको छ। गाडीको छतमा लिडार जडान गरिएको छ।

आर्कफक्सका लागि अल्फा टी७ यस वर्षको प्रमुख मोडल हो। यसलाई यसअघि चोङ्दु अटो शोमा समेत प्रदर्शन गरिएको थियो। आर्कफक्सका लागि अल्फा टी७ बजार विस्तार र बिक्रीको आकार बढाउने महत्वपूर्ण प्रयासका रूपमा हेरिएको छ।

नेपालमा समेत आर्कफक्स ब्रान्ड हालै प्रवेश गरेको छ । यस अनुसार आगामी दिनमा नेपालमा समेत यो गाडी भित्रिने अनुमान गर्न सकिन्छ ।