२१० किलोमिटर रेन्ज दिने जिलीको मिनी ईभी, मूल्य कति ?

काठमाडौं–जिलीले आफ्नो लोकप्रिय मिनी ईभी पान्डाको नयाँ संस्करण चीनमा बिक्री सुरु गरेको छ । घट्दो माग र प्रतिस्पर्धालाई ध्यानमा राख्दै ल्याइएको यस नयाँ भेरियन्टलाई कार्टिङ एडिसन नाम दिइएको छ ।

चीनमा सीमित अवधिको छुटसहित यो कार ६ हजार ५ सय ४० अमेरिकी डलरको सुरुवाती मूल्यमा उपलब्ध गराइएको छ । तीन मिटरभन्दा केही लामो यो स्पोर्ट्स शैलीको तीन ढोके ह्याचब्याक कारले एक पटकको फुल चार्जमा २१० किलोमिटरसम्मको रेन्ज दिने कम्पनीले जनाएको छ ।

सन् २०२३ को फेब्रुअरीमा पहिलो पटक बजारमा आएको पान्डा मिनीले अहिलेसम्म चार लाख २६ हजारभन्दा बढी गाडी बिक्री गरिसकेको छ । यद्यपि पछिल्लो समय यसको बिक्रीमा उल्लेख्य गिरावट आएपछि कम्पनीले नयाँ लुक्स र प्रविधिसहितको अपडेटेड भर्सन प्रस्तुत गरेको हो ।

अधिकतम १०० किलोमिटर प्रतिघण्टाको गतिमा गुड्न सक्ने यो कार विशेष गरी युवा ग्राहकलाई लक्षित गरेर बनाइएको हो ।

यस नयाँ मोडलको सबैभन्दा ठूलो प्राविधिक परिवर्तन ब्याट्रीमा गरिएको छ । यसअघि प्रयोग हुँदै आएको गोसन कम्पनीको ब्याट्रीलाई विस्थापित गर्दै अब विश्वको शीर्ष ब्याट्री निर्माता सिएटीएलको १७.२ किलोवाट आवर क्षमताको एलएफपी ब्याट्री जडान गरिएको छ ।

२२ किलोवाटको डिसी फास्ट चार्जरमार्फत मात्र ३० मिनेटमा यसको ब्याट्री ३० देखि ८० प्रतिशतसम्म चार्ज गर्न सकिन्छ । कारमा ३० किलोवाट क्षमताको सिगंल इलेक्ट्रिक मोटर रहेको छ ।

कारको भित्री भागमा ९.२ इन्चको डिजिटल इन्स्ट्रुमेन्ट क्लस्टर, ८ इन्चको टचस्क्रिन इन्फोटेनमेन्ट सिस्टम, रियर भ्यु क्यामेरा, पार्किङ सेन्सर र दुई वटा एयरब्याग जस्ता आधुनिक सुविधाहरू समावेश गरिएका छन् ।