एक महिनामै ३० हजारभन्दा बढी विद्युतीय कार बिक्री, टाटा एक्लैको हिस्सा ४३ प्रतिशत

काठमाडौं–भारतमा विद्युतीय कारको बजारले तीव्र गति लिएको छ । अगस्ट २०२६ मा भारतमा ३० हजार ५१ युनिट विद्युतीय कार बिक्री भएका छन् । यो संख्या गत वर्षको अगस्टको तुलनामा ५३.१ प्रतिशतले बढी हो ।

अगस्ट २०२५ मा भारतमा १९ हजार ६२९ युनिट विद्युतीय कार बिक्री भएका थिए । एक वर्षमै १० हजारभन्दा बढी विद्युतीय कारको बिक्री बढ्नुले भारतीय बजारमा इलेक्ट्रिक मोबिलिटीप्रतिको आकर्षण तीव्र रूपमा बढिरहेको देखाएको छ ।

तर, जुलाईको तुलनामा भने अगस्टमा विद्युतीय कारको बिक्री ११.१ प्रतिशतले घटेको छ । जुलाईमा ३३ हजार ७९१ युनिट विद्युतीय कार बिक्री भएका थिए ।

भारतीय ईभी बजारमा टाटा मोटर्सको दबदबा कायमै छ । अगस्टमा टाटाका १३ हजार १५८ युनिट विद्युतीय कार बिक्री भएका छन् । गत वर्षको अगस्टमा ८ हजार ६४ युनिट रहेको बिक्री संख्या यसपटक ६३.२ प्रतिशतले बढेको हो । टाटा एक्लैले भारतको विद्युतीय कार बजारमा ४३.८ प्रतिशत हिस्सा ओगटेको छ ।

महिन्द्रा ६ हजार ४६४ युनिट बिक्रीसहित दोस्रो स्थानमा छ । कम्पनीको बिक्री गत वर्षको अगस्टको तुलनामा ५६.२ प्रतिशतले बढेको छ । महिन्द्राको बजार हिस्सा २१.५ प्रतिशत पुगेको छ ।

एमजी ४ हजार ६२२ युनिट विद्युतीय कार बिक्रीसहित तेस्रो स्थानमा छ । तर, कम्पनीको बिक्री गत वर्षको तुलनामा १७.८ प्रतिशतले घटेको छ ।

भारतमा नयाँ प्रवेश गरेको भियतनामी ब्रान्ड भिनफास्टले भने आक्रामक सुरुवात गरेको छ । अगस्टमा भिनफास्टका २ हजार १९९ युनिट विद्युतीय कार बिक्री भएका छन् । जुलाईमा १ हजार ५३२ युनिट रहेको बिक्री संख्या एक महिनामै ४३.५ प्रतिशतले बढेपछि भिनफास्ट भारतको चौथो ठूलो ईभी ब्रान्ड बनेको छ ।

मारुती सुजुकीका १ हजार ४१२, हुन्डाईका ८०३, कियाका ६४५, बीवाईडीका ५४३ र टोयोटाका १६१ युनिट विद्युतीय कार अगस्टमा बिक्री भएका छन् ।