जिली र मर्सिडिज बेन्ज मिलेर नयाँ माइक्रो ईभी ल्याउँदै, रेन्ज ३०० किलोमिटर

काठमाडौं–चिनियाँ अटो जायन्ट जिली र जर्मन लक्जरी ब्रान्ड मर्सिडिज बेन्जको संयुक्त पहलमा नयाँ माइक्रो ईभी आउने भएको छ ।

चीनको उद्योग तथा सूचना प्रविधि मन्त्रालयले हालै सार्वजनिक गरेको नयाँ सवारी साधन फाइलिङ विवरण अनुसार यी दुई अटो उत्पादकको सहकार्यमा निर्मित दुई सिटे माइक्रो विद्युतीय कार ‘स्मार्ट ३२’ को आधिकारिक विवरण बाहिर आएको हो ।

सहरी यात्रालाई सहज बनाउने उद्देश्यले डिजाइन गरिएको यो कार दुईवटा २,७५१ एमएम र २,७६४ एमएमको लम्बाई विकल्पमा उपलब्ध हुनेछ ।

दुवै संस्करणको चौडाइ १,६६९ एमएम, उचाइ १,५५५ एमएम र ह्विलबेस १,८७५ एमएम रहेको छ । १,१३० किलोग्राम तौल रहेको यस कारको अधिकतम गति प्रतिघण्टा १४० किलोमिटरसम्म रहेको छ ।

इन्फिमोसन कम्पनीले विकास गरेको ६० किलोवाट (८० हर्सपावर) क्षमताको मोटर रहेको यस कारमा सीएटीएलद्वारा निर्मित ३५.७ किलोवाट आवरको लिथियम आइरन फोस्फेट ब्याट्री प्रयोग गरिएको छ । यस ब्याट्रीले डब्लुएलटीपी मापदण्ड अनुसार एकपटकको पूर्ण चार्जमा ३०० किलोमिटरसम्मको रेन्ज प्रदान गर्ने दाबी गरिएको छ ।

सुरक्षाका लागि कारमा एन्टी–लक ब्रेकिङ सिस्टम (एबीएस) र इभेन्ट डेटा रेकर्डर (ईडीआर) जस्ता सुविधाहरू समावेश गरिएको छ ।