स्कोडाको नयाँ एसयूभी ६ मिनेटमै सोल्ड आउट !

भारतीय बजारमा स्कोडा ‘आरएस’ सिरिजको क्रेज कतिसम्म छ भन्ने कुरा कम्पनीको नयाँ गाडीले प्रमाणित गरिदिएको छ । स्कोडाले आफ्नो बहुप्रतीक्षित फ्ल्यागशिप एसयूभी कोडियाक आरएसको बुकिङ खुला गरेको मात्र ६ मिनेटभित्र सबै गाडीहरू सोल्ड आउट भएको दाबी गरेको छ ।

कम्पनीका अनुसार पहिलो ब्याचका लागि केवल ५० युनिट मात्र आयात गर्ने घोषणा गरिएको थियो, जुन बुकिङ खुला हुनासाथ ग्राहकहरूले क्षणभरमै बुक गरिसकेका थिए ।

भारतमा स्कोडाको स्पोर्टी आरएस मोडलहरूको फ्यान फलोइङ निकै बलियो छ । २२ वर्षअघि पहिलो पटक अक्टाभिया आरएस भित्रिएदेखि नै यो ब्रान्डले एसयूभी पारखीको मन जित्दै आएको छ । यसअघि २०२५ मा सार्वजनिक भएको अक्टाभियाको पछिल्लो मोडल पनि मात्र २० मिनेटमा बिक्री भएर रेकर्ड राखेको थियो भने, यस पटक कोडियाक आरएसले त्यो रेकर्डलाई पनि तोडिदिएको छ ।

नयाँ कोडियाक आरएसमा अक्टाभिया आरएसकै जस्तो शक्तिशाली २.० लिटर टर्बो–पेट्रोल इन्जिन प्रयोग गरिएको छ । यसले २६१ बीएचपी पावर र ४०० एनएम टर्क जेनेरेट गर्दछ । स्कोडाले यसमा ७–स्पिड डुअल–क्लच अटोमेटिक गियरबक्स र अल–ह्विल–ड्राइभ सिस्टम उपलब्ध गराएको छ ।
एसयूभीमा अपग्रेड गरिएको पावरफुल ब्रेक र एडप्टिभ सस्पेन्सन जस्ता प्रिमियम फिचर्स रहेका छन् ।

यस दमदार एसयूभीले मात्र ६.३ सेकेन्डमा ० देखि १०० किलोमिटर प्रतिघण्टाको रफ्तार समात्न सक्छ । त्यस्तै, यसको अधिकतम गति २३१ किलोमिटर प्रतिघण्टा रहेको छ । रफ्तार र प्रिमियम लुक्स मन पराउनेहरूका लागि यो गाडी निकै उपयुक्त हुनेछ ।