सस्तो गाडी बनाउने होडबाजीप्रति जिलीका अध्यक्ष आक्रोशितः मानव जीवन खेलवाड होइन!

चिनियाँ गाडी उत्पादक कम्पनी जिलीका अध्यक्ष ली शुफुले अटोमोटिभ उद्योगमा बढ्दै गएको कम लागतको उत्पादन र इन्जिनियरिङ ‘सर्टकट’ प्रति कडा आपत्ति जनाएका छन् । २०२६ चाइना अटोमोटिभ चोङकिङ फोरममा बोल्दै उनले तत्काल वित्तिय प्रतिफल वा नाफा कमाउने उद्देश्यले गरिने यस्ता अभ्यासले ब्रान्डको दीर्घकालीन अस्तित्व र मानव जीवन दुवैलाई खतरामा पार्ने चेतावनी दिएका हुन् ।

अध्यक्ष शुफुले सवारी साधनहरू उच्च मूल्य र लामो समयसम्म टिक्ने टिकाउ सामान भएकाले यसमा कठोर जीवनचक्र परीक्षण अनिवार्य हुनुपर्नेमा जोड दिए । उनले भने, ‘सवारी सुरक्षाले प्रत्यक्ष रूपमा मानव जीवनलाई असर गर्छ । त्यसैले, इन्जिनियरिङ प्रक्रियाहरू गणितीय सूत्र जस्तै पारदर्शी र प्रमाणित हुनुपर्छ ।’

गाडी विकासमा अपनाइने छोटो अवधिको विधिलाई ‘फास्ट–फुड उत्पादन दर्शन’ को संज्ञा दिँदै उनले यसले कम्पनीहरूका लागि अपरिवर्तनीय परिचालन र कानुनी जोखिमहरू सिर्जना गर्ने बताए । उनले बजारमा चल्ने सस्तो प्रतिलिपि अभ्यासलाई पूर्ण रूपमा अस्वीकार गरे ।

उनको यो धारणा हालै अर्को प्रमुख चिनियाँ ईभी निर्माता कम्पनी बीवाईडीका कार्यकारीले दिएको चेतावनीसँग पनि मेल खान्छ, जसमा उद्योग बचाउन र बजारमा टिकिरहन ‘स्वतन्त्र अनुसन्धान र नवप्रवर्तन’ अनिवार्य रहेको उल्लेख गरिएको थियो ।

यही नीतिगत स्पष्टताका साथ जिलीले सस्तो र कमसल उत्पादन मोडलहरूबाट टाढा रहने गरी आफ्नो व्यावसायिक ढाँचामा व्यापक परिवर्तन सुरु गरेको छ । अत्यधिक प्रतिस्पर्धात्मक मास मार्केट सेग्मेन्टमा आफ्नो दीर्घकालीन प्रभुत्व जमाउन कम्पनीले अनावश्यक उत्पादन युनिटलाई क्रमबद्ध रूपमा बन्द गर्ने निर्णय गरेको छ ।