हुन्डाईले बायोनमा आधारित नयाँ एसयूभी भारतीय बजारमा ल्याउने तयारी

दक्षिण कोरियाली अटो निर्माता कम्पनी हुन्डाईले आफ्नो विश्वव्यापी मोडल ‘बायोन’ मा आधारित नयाँ क्रसओभर एसयूभी भारतीय बजारमा ल्याउने तयारी गरेको छ। सो नयाँ मोडलले मारुती सुजुकीको फ्रोन्क्स, टोयोटा टेसर र किया सिरोससँग प्रत्यक्ष प्रतिस्पर्धा गर्ने अपेक्षा गरिएको छ।

हाल हुन्डाईसँग कम्प्याक्ट सेग्मेन्टमा भेन्यु र मिड-साइज सेग्मेन्टमा क्रेटा उपलब्ध छ । नयाँ बायोनमा आधारित एसयूभीले यी दुई मोडलबीचको मूल्य र आकारको अन्तरलाई पूरा गर्ने बताइएको छ। कियाले सोनेट र सेल्टोसबीच सिरोसलाई स्थान दिएझैँ हुन्डाईले पनि भेन्यु र क्रेटाबीच यसलाई पोजिसन गर्ने देखिएको छ।

हालै परीक्षणको समयमा लिक भएको तस्बिर अनुसार नयाँ एसयूभीको डिजाइन निकै आकर्षक देखिएको छ । अग्लो स्टान्स, बक्सी डिजाइन, बलियो हुड लाइन र रुफरेलले यसलाई दमदार लुक दिएको छ । साथै, हुन्डाईका विश्वव्यापी विद्युतीय कारबाट प्रेरित स्पोर्टी अलोय ह्विलले यसको आधुनिक लुकलाई अझ आकर्षक बनाउनेछ ।

हुन्डाईले सो एसयूभीलाई अत्याधुनिक प्रविधिले सुसज्जित बनाउने तयारी गरेको छ। गाडीमा ठुलो टचस्क्रिन इन्फोटेनमेन्ट सिस्टम, डिजिटल ड्राइभर डिस्प्ले र एड्भान्स्ड ड्राइभर असिस्टेन्स सिस्टम जस्ता सेफ्टी प्रविधि रहने अपेक्षा गरिएको छ। साथै वायरलेस चार्जिङ, एम्बियन्ट लाइटिङ, प्रिमियम साउन्ड सिस्टम, स्मार्टफोन कनेक्टिभिटी र ओभर द एयर अपडेट जस्ता आधुनिक फिचर पनि समावेश हुनेछ ।

कम्पनीले यसमा भेन्यु र क्रेटामा प्रयोग भएका १.२ लिटर नेचुरली एस्पिरेटेड पेट्रोल, १.० लिटर टर्बो पेट्रोल तथा १.५ लिटर टर्बो डिजेल इन्जिन प्रयोग गर्न सक्ने अनुमान गरिएको छ। साथै, हाइब्रिड पावरट्रेनको सम्भावनाबारे पनि चर्चा भइरहेको छ, यद्यपि कम्पनीले यसबारे आधिकारिक पुष्टि गरेको छैन। गाडीमा म्यानुअल र अटोमेटिक दुवै गियरबक्स विकल्प उपलब्ध हुने बताइएको छ।