चैत महिना सम्म ईभी आयातमा १० प्रतिशत कमी, पेट्रोलियम पदार्थबाट चल्ने कारको आयातमा छलाङ

काठमाडौं – चालु आर्थिक वर्ष २०८२/८३ को तेस्रो त्रैमासिक अर्थात चैत मसान्तसम्ममा नेपालमा १६ अर्ब ६५ करोड ७५ लाख ८२ हजार रुपैयाँ बराबरको ७ हजार १ सय ७१ थान विद्युतीय चारपांग्रे सवारी साधान आयात भएको छ।

भन्सार विभागले हालै सार्वजनिक गरेको चालु आर्थिक वर्ष २०८२/८३ को चैत महिनासम्मको वैदेशिक व्यापार प्रतिवेदनमा यो आँकडा उल्लेख गरिएको हो।

यो अवधिमा ५० किलोवाट सम्मका २,५०६ ईभी, ५१ देखि १०० किलोवाट सम्मका ४,०८३ र १०१ देखि २०० किलोवाट सम्मका ५७४ ईभी भित्रिएका छन् । यो अवधिमा २०१ किलोवाट भन्दा माथिका ८ युनिट ईभी भित्रिएका छन् । यस अनुसार चालु आर्थिक वर्षको ९ महिना सम्म समग्रमा ७, १७१ ईभी भित्रिएका छन् ।

यो अवधिमा चीनबाट ५० किलोवाट सम्मका १ हजार ४२०, ५१ देखि १०० किलोवाट सम्मका २ हजार ९२६ र १०१ देखि २०० किलोवाट सम्मका ५१५ ईभी भित्रिएका छन् भने २०१ देखि ३०० किलोवाट सम्मका ५ युनिट ईभी भित्रिएका छन् ।

त्यसैगरी भारतबाट ५० किलोवाट सम्मका १ हजार ८६, ५१ देखि १०० किलोवाट सम्मका ७१६ र १०१ देखि २०० किलोवाट सम्मका ३५ ईभी भित्रिएका छन् ।

यसैगरी थाइल्यान्डबाट ५१ देखि १०० किलोवाट सम्मका ४४० युनिट र बेलयातबाट १ युनिट भित्रिएको छ भने १०१ देखि २०० किलोवाट सम्मका जर्मनीबाट १० युनिट, दक्षिण कोरियाबाट ४ युनिट र अमेरिकाबाट १० युनिट भित्रिएका छन् ।

२०१ देखि ३०० किलोवाट सम्मका अष्ट्रियबाट १ युनिट र अमेरिकाबाट २ युनिट भित्रिएका छन् ।

प्रतिवेदनका अनुसार यसरी भित्रिएका चारपाङ्ग्रे सवारी साधनमा विशेषगरी सामान्य कार, जीप र भ्यानका साथै अतिरिक्त मोटर पावर भएका कार, जीप र भ्यान रहेका छन्। उक्त परिमाणको आयातमार्फत् सरकारले १० अर्ब ११ करोड ५४ लाख ६७ हजार रुपैयाँ राजस्व आम्दानी गरेको छ।

गत वर्षको तुलनामा यो अवधिमा ईभीको आयातमा कमी आएको छ । गत वर्षको यही अवधिमा ७ हजार ९६७ ईभी आयात भएका थिए । यस अनुसार समग्रमा ९.९७ प्रतिशत गिरावट आएको हो ।

चालु आर्थिक वर्षमा ईभी आयात घट्दा पेट्रोलियम पदार्थबाट चल्ने कारको आयातले भने छलाङ हानेको छ । यो अवधिमा ४ हजार १४० युनिट पेट्रोलियम पदार्थबाट चल्ने कार आयात भएको छ, जुन गत वर्षको सोही अवधिको तुलनामा ५०.९९ प्रतिशत धेरै हो । गत वर्ष चैतसम्म कुल २ हजार ७४२ युनिट पेट्रोलियम पदार्थबाट चल्ने कार आयात भएको थियो ।