मध्यपूर्व द्वन्द्वको फाइदा चिनियाँ एनईभीलाई, जिलीको निर्यातमा ४७९ प्रतिशतले उछाल

मध्यपूर्ब द्वन्द्वले चिनियाँ ईभीको माग ह्वात्तै बढाएको छ । मार्चमा मात्रै चीनको न्यु इनर्जी भेइकल (एनईभी) निर्यात ३ लाख ४९ हजार युनिट पुगेको चाइना प्यासेन्जर कार एसोसिएसन (सीपीसीए)ले बताएको छ । जुन, अघिल्लो वर्षको सोही अवधिको तुलनामा १३९.९ ले बढी हो ।

हर्मुजको जलडमरूममा आपूर्ति अवरोधको बीचमा यो वृद्धि भएको हो, जसले धेरै क्षेत्रहरूमा इन्धनको मूल्य बढाएको छ । मध्यपूर्व द्वन्द्वले यदि सबैभन्दा बढी फाइदा कसैलाई दिएको छ भने ती चिनियाँ अटोमेकर हुन् ।

बीवाईडीले मार्चमा विदेशमा १ लाख २० हजार एनईभी बिक्री गरेर ६५.२ प्रतिशत बृद्धि हासिल गरेको छ । त्यसैगरी अर्को चिनियाँ अटो जायन्ट जिलीको निर्यात १२० प्रतिशतले बढेर ८१ हजार युनिट पुगेको छ । जसमध्ये ५१ हजार एनईभी छन् । जिलीले गत वर्षको सोही अवधिको तुलनमा आफ्नो एनईभी निर्यात ४७९ प्रतिशतले बृद्धि गरेको छ । उदीयमान एनईभी ब्रान्ड लिपमोटर र जीएसी एवोनले पनि उल्लेख्य बृद्धि हासिल गरेका छन् ।

द्वन्द्वको प्रभाव स्वरुप अष्ट्रेलियामा, चिनियाँ ब्रान्डको विस्तार द्रुत गतिमा भइरहेको छ । चिनियाँ ब्रान्डले २५ प्रतिशत बजार हिस्सा हासिल गरेर अष्ट्रेलियमा जापानी अटोमेकरहरूको २८ वर्षको प्रभुत्व समाप्त गरेको छ ।

मिडिया रिपोर्टका अनुसार इन्धन मूल्य वृद्धि पछि अष्ट्रेलियमा एनईभीमा ग्राहको रुचि ५० प्रतिशतले बृद्धि भएको छ । बढ्दो इन्धन मूल्यले अष्ट्रेलिया र न्यूजिल्याण्ड जस्ता बजारहरूमा उपभोक्ता व्यवहारमा प्रत्यक्ष प्रभाव पारेको हो ।

सीपीसीएको तथ्याङ्क अनुसार, चीनले मार्च २०२६ मा ६ लाख ९५ हजार युनिट सवारीसाधन निर्यात गरेका छ । जसमा एनईभीले कुल निर्यातको लगभग ५० प्रतिशत हिस्सा लिएका छन् । वार्षिक वृद्धिले समग्र निर्यात वृद्धिलाई उल्लेखनीय रूपमा उछिनेको छ, जसले चीनको आउटबाउन्ड अटो ढुवानीको संरचनामा द्रुत परिवर्तनलाई संकेत गर्दछ ।