थाइल्यान्डमा लन्च भयो बीवाईडीको सस्तो सानो इलेक्ट्रिक कार

बीवाईडीले थाइल्याण्डमा आफ्नो सबैभन्दा सानो इलेक्ट्रिक कार एट्टो १ लन्च गरेको छ। कम्पनीले बैंककमा आयोजित २०२६ बैंकक अन्तर्राष्ट्रिय मोटर शोमा सो गाडी लन्च गरेको हो ।

एट्टो १ लाई अन्तर्राष्ट्रिय बजारमा सिगल वा डल्फिन सर्फ नामले पनि चिनिन्छ । सहर क्षेत्रमा प्रयोगका लागि डिजाइन गरिएको सो कारको लम्बाइ ३९२५ एमएम, चौडाइ १७२० एमएम र उचाइ १५९० एमएम रहेको छ भने यसको ह्विलबेस २५०० एमएम छ । सो कार डायनामिक र प्रिमियम गरी २ भेरिएन्टमा उपलब्ध रहेको छ, जसमा ब्याट्री क्षमता र फिचर फरक फरक रहेका छन्।

लुक्स र सुविधाको हिसाबले एट्टो १ आधुनिक र आकर्षक देखिन्छ। यसमा एलईडी डे टाइम रनिङ लाइटसहित एलईडी हेडलाइट र टेललाइट, स्पोर्टी रियर स्पोइलर, फ्लोटिङ रूफ डिजाइन, १५ इन्चका अलोय ह्विल र रेन सेन्सिङ वाइपर जस्ता फिचर समावेश छ ।

बीवाईडी एट्टो १ मा इको, नर्मल र स्पोर्ट जस्ता ड्राइभिङ मोडहरू उपलब्ध छन् । यसको इन्टेरियरमा १०.१ इन्चको टचस्क्रिन इन्फोटेनमेन्ट सिस्टम, ७ इन्चको डिजिटल इन्स्ट्रयुमेन्ट क्लस्टर, वायरलेस स्मार्टफोन कनेक्टिभिटी, अटोमेटिक क्लाइमेट कन्ट्रोल, एयर प्युरिफायर, रियर भ्यु क्यामेरा, ६-वे पावर ड्राइभर सिट, ६ एयरब्याग, क्रुज कन्ट्रोल र एडभान्स्ड ड्राइभर असिस्टेन्ट सिस्टम जस्ता प्रविधि उपलब्ध गराएको छ ।

एट्टो १ मा ३०.०८ किलोवाट आवरदेखि ३८.८८ किलोवाट आवरसम्मको ब्लेड एलएफपी ब्याट्री विकल्प दिइएको छ। एकपटक पूर्ण चार्ज गर्दा यसले ३०० किलोमिटरदेखि ३८० किलोमिटरसम्मको दूरी तय गर्न सक्छ। चार्जिङका लागि ६.६ किलोवाट एसी चार्जर र ३० किलोवाट डीसी फास्ट चार्जरको सुविधा रहेको छ। अगाडि जडान गरिएको इलेक्ट्रिक मोटरले ७४ हर्सपावर पावर र १३५ एनएमको टर्क उत्पादन गर्छ, जसले कारलाई ० देखि ५० किलोमिटर प्रतिघण्टा गति ५ सेकेन्डभन्दा कम समयमा पुर्‍याउन सक्षम बनाउँछ।