बैंकक इन्टरनेसनल मोटर शो : ईभीको माग तीव्र वृद्धि, देखिदै तेल संकटको प्रत्यक्ष असर

बढ्दो इन्धनको मूल्य र सम्भावित तेल संकटको प्रत्यक्ष असर बैंकक इन्टरनेसनल मोटर शोमा समेत देखिएको छ ।उपभोक्ताहरू परम्परागत इन्धनबाट चल्ने सवारी अर्थात आइसबाट ईभी सवारीतर्फ तीव्र रूपमा आकर्षित हुन थालेका छन्। चीन, जापान लगायतका देशका अटो निर्माता कम्पनीहरूले यस अवसरलाई लक्षित गर्दै आफ्नो ईभी प्रवद्र्धनलाई आक्रामक बनाएका छन्।

बुधबारदेखि सुरु भई अप्रिल ५ सम्म चल्ने बैंकक इन्टरनेसनल मोटर शोले यो परिवर्तनशील प्रवृत्तिलाई स्पष्ट रूपमा देखाएको छ। कार्यक्रममा सहभागी एक स्थानीय वितरकका अनुसार पछिल्ला केही सातामै ईभी अर्डर उल्लेखनीय रूपमा बढेको छ।

जिली ब्रान्डको आधिकारिक वितरक थोन्बुरी न्युस्टर्नका जनरल म्यानेजर कुल्लाचार्ट चुटिचावाकुलले भने, “यो हाम्रो लागि सुखद समस्या हो। इरानसँगको तनावका कारण उत्पन्न तेल संकटले ग्राहकहरू ईभी तर्फ आकर्षित भएका छन्। उनीहरू बढ्दो तेल मूल्य र अभावको झन्झटबाट बच्न चाहन्छन्।”

उनका अनुसार जिलीको नयाँ कम्प्याक्ट ईभी ईएक्स२ को बुकिङ जनवरीमा ९ सयबाट मार्चसम्म आइपुग्दा झण्डै २ हजार पुगेको छ, जसले मागको तीव्र वृद्धि देखाउँछ।

बढ्दो मागलाई ध्यानमा राख्दै विशेषगरी चिनियाँ कम्पनीहरूले मोटर शोमा ६ लाखदेखि ८ लाख थाई भाट अर्थात करिब १८ हजार ६०० देखि २४ हजार ८०० अमेरिकी डलर मूल्य रेन्जमा ईभी उपलब्ध गराएका छन्, जुन बजारको अपेक्षित १० लाख भाटभन्दा निकै सस्तो हो।

पहिले ईभीमा कम ध्यान दिने जापानी कम्पनीहरू पनि अहिले सक्रिय बनेका छन्। टोयोटाले बीजेड४एक्स इलेक्ट्रिक एसयूभी सार्वजनिक गरेको छ भने माज्दाले माज्दा ६ई इलेक्ट्रिक सेडान प्रदर्शनमा राखेको छ।

मध्यपूर्वको संकटका कारण तेल आपूर्ति प्रभावित हुँदा ईभी प्रवद्र्धन क्षेत्रीय रूपमा पनि बढ्दै गएको छ। भियतनामी कम्पनी भिनफास्टले समेत विभिन्न एशियाली बजारमा आफ्ना ईभीमा छुट दिँदै नयाँ ग्राहक आकर्षित गर्न खोजिरहेको छ।

थाइल्याण्डमा अहिले इन्धन अभावको अवस्था देखिएको छ। पेट्रोल पम्पमा सीमित मात्रामा इन्धन उपलब्ध हुँदा सवारी चालकहरू लाइनमा बस्न बाध्य छन्, जसले अवस्थालाई अझ जटिल बनाएको छ।

गत वर्ष थाइल्याण्डमा करिब ६ लाख २१ हजार नयाँ सवारी बिक्री भएको थियो, जसले यसलाई दक्षिणपूर्व एशियाको तेस्रो ठूलो बजार बनाएको छ। २०२५ मा ईभी बिक्री ७४ प्रतिशतले बढेर १ लाख २२ हजार १२८ युनिट पुगेको छ।