ट्रायम्फको नयाँ ३५० सीसी मोटरसाइकल आउने, रोयल इन्फिल्ड र होन्डासँग प्रतिस्पर्धा हुने

ट्रायम्फ मोटरसाइकल र बजाज अटोले संयुक्त रूपमा भारतमा नयाँ ३५० सीसी क्षमताको मोटरसाइकल ल्याउने तयारी गरेका छन् । रिपोर्टका अनुसार ट्रायम्फको नयाँ ३५० सीसी अप्रिल महिनामा लन्च हुन सक्ने अनुमान गरिएको छ ।

नयाँ ट्रायम्फमा ३५० सीसी सिंगल सिलिन्डर, लिक्विड कुल्ड इन्जिनमा आधारित हुने अपेक्षा गरिएको छ। यद्यपि यसको आधिकारिक पावर विवरण सार्वजनिक गरिएको छैन, तर यसले करिब ३० देखि ३५ बीएचपी पावर उत्पादन गर्ने अनुमान गरिएको छ। यसलाई ६ स्पिड गियरबक्ससँग जोड्न सकिनेछ।

रिपोर्टका अनुसार ३५० सीसीमा दुई मोडल समावेश हुन सक्ने अनुमान गरिएको छ, जसमा स्पिड र स्क्र्याम्बलर शैली रहनेछ । यसको डिजाइन हालका ४०० सीसी मोडलसँग मिल्दोजुल्दो हुने अनुमान छ। यसमा गोलाकार एलईडी हेडलाइट, टियर ड्रप आकारको इन्धन ट्याङ्की र प्रिमियम फिनिश जस्ता विशेषता कायम रहनेछ ।

ट्रायम्फको नयाँ मोटरसाइकलकाे ३५० सीसी सेगमेन्टमा रोयल इन्फिल्ड क्लासिक ३५०, रोयल इन्फिल्ड हन्टर ३५०, रोयल इन्फिल्ड बुलेट ३५०, होन्डा सीबी३५० र जावा येज्दी ब्रान्डका मोटरसाइकलसँग प्रतिस्पर्धा हुने अपेक्षा गरिएको छ ।