चुनावमा इन्धन आयात नियमित, क्यान र ड्रममा भर्न निषेध

काठमाडौं–नेपाल आयल निगमले पेट्रोलियम पदार्थ आयात नियमित रहेकाले अनावश्यक भण्डारण नगर्न सर्वसाधारणमा आग्रह गरेको छ ।

निगमले अनावश्यक भण्डारण गर्दा दुर्घटनाको जोखिमसमेत हुने भएकाले त्यसो नगर्न अनुरोध गर्दै इन्धन नियमित भइरहेको र चुनावभरि नियमित हुने जानकारी दिएको छ ।

निगमका अनुसार, पेट्रोलियम पदार्थ आयात पाइप लाइनमार्फत नियमित रूपमा भइरहेको र आसन्न निर्वाचनको समयमा पनि पर्याप्त मात्रामा आयात जारी रहनेछ ।

निगमले पेट्रोलियम पदार्थको अनावश्यक रूपमा क्यान, ड्रममा स्टोर गर्दा हुन सक्ने सम्भावित आगजनी दुर्घटनाको जोखिमलाई दृष्टिगत गरी क्यान, ड्रममा पेट्रोलियम भर्न निषेध गरिएको बताएको छ ।

सम्भावित आगजनीजन्य दुर्घटना जोखिम न्यूनीकरण गर्न आवश्यक परिमाणमा मात्र पेट्रोलियम पदार्थ खरिद गरी सहयोग गर्न पनि निगमले सम्पूर्ण उपभोक्तामा अनुरोध गरेको छ ।