जापानी बजारमा बीवाईडीको नयाँ सानो इलेक्ट्रिक कार र्याक्को लन्च हुँदै

बीवाईडीले जापानको साना तथा साँघुरा सडकलाई लक्षित गर्दै नयाँ सानो इलेक्ट्रिक कार ‘र्याक्को’ लन्च गर्ने तयारी गरेको छ। जापानी भाषामा र्याक्को शब्दको अर्थ समुद्री जीव हो ।

जापानका कडा सवारी मापदण्डअनुसार निर्माण गरिएको सो कारको लम्बाइ केवल ३३९५ एमएम रहेको छ। आकारमा सानो भए पनि यसको उचाइ र बक्स शैलीको डिजाइनले भित्री भागमा पर्याप्त ठाउँ उपलब्ध छ । सहरको भीडभाड, ट्राफिक र साँघुरा सडकलाई ध्यानमा राखेर तयार गरिएको सो मोडल चलाउन र पार्किङ गर्न सहजता प्रदान गर्ने कम्पनीको दाबी छ।

र्याक्को दुई फरक ब्याट्री क्षमतामा उपलब्ध हुनेछ। २० किलोवाट आवर क्षमताको ब्याट्रीले एक पटक पूर्ण चार्ज गर्दा करिब १८० देखि २०० किलोमिटर दूरी तय गर्न सक्नेछ, जुन दैनिक शहरी यात्राका लागि उपयुक्त मानिएको छ। त्यस्तै ३० किलोवाट आवर क्षमताको विकल्पले करिब ३०० किलोमिटर दूरी पार गर्न सक्ने भएकाले लामो दूरीका यात्रुका लागि उपयुक्त हुने अपेक्षा गरिएको छ।

रिपोर्टअनुसार यसले १०० किलोवाटसम्मको डिसी चार्जिङ सिस्टमलाई समर्थन गर्न सक्छ । जापानमा यसको सुरुवाती मूल्य करिब २५ लाख जापानी येन रहने अनुमान गरिएको छ । सो कारले निसान र मित्सुबिशी जस्ता जापानी ब्रान्डका इलेक्ट्रिक मोडललाई चुनौती दिनेछ।