११ लाख भारुमै लन्च भयो सुजुकी ई–भिटारा, नेपालमा छिट्टै बिक्री थालिने

मारुती सुजुकीले इलेक्ट्रिक एसयूभी ई-भिटारा आधिकारिक रूपमा लन्च गरेको छ । सुरुवाती मूल्य १० लाख ९९ हजार भारु निर्धारण गरेर सुजुकीले आफ्नो पहिलो इलेक्ट्रिक एसयूभी लन्च गरेको हो । यो मूल्य ब्याट्री–एज–अ–सर्भिस मोडलका लागि तय गरिएको कम्पनीले जनाएको छ ।

कम्पनीले ई–भिटारामा २ प्रकारका ब्याट्री प्याक उपलब्ध गराएको छ, जसमा ४९ किलोवाट आवर र ६१ किलोवाट आवर क्षमताका विकल्प छन्। यी ब्याट्रीले फुल चार्जमा ५४३ किलोमिटरभन्दा बढी रेन्ज तय गर्न सक्ने दाबी गरिएको छ। यसमा जडान गरिएको मोटरले अधिकतम १२८ किलोवाट पावर र १९३ एनएमको टर्क उत्पादन गर्छ।

सुविधाका हिसाबले यसमा प्यानोरामिक सनरुफ, अटोमेटिक क्लाइमेट कन्ट्रोल, भेन्टिलेटेड फ्रन्ट सिट, एलईडी हेडलाइट र टेललाइट, एम्बियन्ट लाइटिङ तथा ड्युल टोन इन्टेरियर जस्ता फिचर समावेश गरिएको छ । साथै यसमा ७ वटा एयरब्याग, ३६० डिग्री क्यामेरा, अटो होल्ड सुविधा सहितको इलेक्ट्रोनिक पार्किङ ब्रेक तथा लेभल २ एडास जस्ता सेफ्टी फिचर उपलब्ध गराइएको छ।

कम्पनीले हाल सो एसयूभी बासको साथमा मात्र लन्च गरेको छ। यसको प्रारम्भिक मूल्य १० लाख ९९ हजार भारु तोकिएको छ भने त्यसपछि प्रति किलोमिटर ३ रुपैयाँ ९९ पैसा अतिरिक्त शुल्क लाग्नेछ। यो मूल्य आगामी मार्च ३१ सम्म मात्र लागू हुने कम्पनीले जनाएको छ। साथै ३ वर्षपछि गाडीको ६० प्रतिशतसम्म बाईब्याक सुविधा पनि प्रदान गरिनेछ।

मारुती ई–भिटाराले बजारमा हुन्डाई क्रेटा इलेक्ट्रिक, एमजी विन्डसर, टाटा कर्भ ईभी, महिन्द्रा बीई ६ तथा टाटा ह्यारियर ईभी जस्ता इलेक्ट्रिक एसयूभीसँग प्रतिस्पर्धा गर्नेछ।

ई–भिटारा नेपाली बजारमा यसअघि नै सार्बजनिक भइसकेको विद्युतीय कार हो । सुजुकीको नेपालका लागि आधिकारिक वितरक सिजी मोटोकर्पले गत नाडा अटो शोमार्फत सार्बजनिक गरेको यस कारको बिक्री भारतमा औपचारिक लन्च नभका कारण रोकिएको थियो । भारतमा मूल्य घोषणासहित औपचारिक लन्च भएकाले अवको केहि समयमै नेपालमा समेत यसको बिक्री प्रारम्भ हुने अनुमान गर्न सकिन्छ ।