ईभी प्रयोगमा नेपाल विश्वकै दोस्रो स्थानमा, नर्वे पहिलो बन्दा अन्य देशको अवस्था के ?

काठमाडौं–नेपाल विद्युतीय सवारीसाधन (ईभी) प्रयोगका हिसावले विश्वकै दोस्रो स्थानमा सुचिकृत भएको छ । अन्तर्राष्ट्रिय ऊर्जा एजेन्सी र एम्बरको तथ्यांकअनुसार नेपाल ईभी खपतमा विश्वकै दोस्रो स्थानमा देखिएको हो ।

तथ्यांकअनुसार नर्वे पहिलो स्थानमा देखिएको छ । सन् २०२५ मा नर्वेमा ९७ प्रतिशत ईभी बिक्री भई नर्वे पहिलो स्थानमा सुचिकृत भएको हो । दोस्रो स्थानमा रहेको नेपालमा ईभी बिक्री हिस्सा ७३ प्रतिशत पुगेको उक्त तथ्यांकले देखाएको छ ।

नयाँ भित्रिने सवारीसाधनमध्ये ठूलो हिस्सा विद्युतीय सवारीले ओगट्न थालेपछि नेपालले अन्तर्राष्ट्रिय स्तरमै दोस्रो स्थानमा पुगेको हो । नेपालमा बिक्री भएका कुल नयाँ कारमध्ये ईभीको हिस्सा ७३ प्रतिशत छ । अर्थात्, नेपालमा १०० वटा नयाँ कार बिक्री हुँदा ७३ वटा ईभी बिक्री भएका हुन् ।

त्यसैगरी ईभी प्रयोग बढ्नेमा तेस्रो स्थानमा डेनमार्क रहेको छ । डेनमार्कमा सन् २०२५ मा ईभीको हिस्सा ६९ प्रतिशत रहेको छ । चौथो स्थानमा सुचिर्कत स्वीडेनमा ६१ प्रतिशत र ५७ प्रतिशत हिस्सासहित आइसल्यान्ड पाँचौ स्थानमा देखिएको छ । त्यसैगरी फिनल्यान्डमा ५६ प्रतिशत, नेदरल्याण्डमा ५६ प्रतिशत, बेल्जियममा ४३ प्रतिशत, पोर्चुगलमा ३७ प्रतिशत र आयरल्याण्डमा ३४ प्रतिशत हिस्सा ईभीले लिएको छ ।

विश्वकै ठूला अटो बजारमध्येका अमेरिका, जापान, भारत, ब्राजिललगायत देश भने सूचीको निकै तल छन् । अमेरिकामा नयाँ कार बिक्रीमा ईभीको हिस्सा १० प्रतिशत मात्रै रहेको छ । साउथ अफ्रिकामा ईभीको हिस्सा १ प्रतिशत मात्र रहेको छ । जापानमा ३ प्रतिशत, मेलेसियामा ४ प्रतिशत, भारतमा ४ प्रतिशत, रोमनिया र क्रोसियामा ५ प्रतिशत, मेक्सिकोमा ६ प्रतिशत ईभीको हिस्सा रहेको तथ्यांकले देखाएको छ ।

तथ्यांकअनुसार सबैभन्दा कम ईभी प्रयोग गर्नेमा साउथ अफ्रिका, जापान, मेलेसिया, भारत, रोमनिया, क्रोसिया, मेक्सिको लगायत छन् ।