युरोपबाट आयात हुने कारमा भारी मात्राले कर कटौती गर्दै भारत, यी ब्रान्डलाई हुनेछ फाइदा

भारतले युरोपियन युनियनबाट आयात हुने कारमा भारी मात्राले कर घटाउने भएको छ । भारत सरकारको यस कदमले भविष्यमा युरोपबाट आयात हुने प्रिमियम कारको मूल्य निकै सस्तो हुनेछ । मिडिया रिपोर्टका अनुसार, हाल लाग्दै आएको ११० प्रतिशत करलाई घटाएर ४० प्रतिशतमा झार्न लागिएको हो ।

युरोपबाट आयत हुने कारमा कर घटाउन सहमत भएको भारतले कोटा भने निर्धारण गर्ने भएको छ । जसअनुसार, १५ हजार युरोभन्दा बढि मूल्य भएका कारमा मात्र कर कटौती हुनेछ भने यी कार २ लाख युनिटमा मात्र आायत गर्न पाइनेछ । विस्तारै कर घटाएर १० प्रतिशतसम्मा झार्न सकिने उल्लेख गरिएके छ ।

यद्यपि, घरेलु उत्पादकहरूलाई सुरक्षा दिन पहिलो ५ वर्षको लागि ईभीलाई भने आयत शुल्क कटौतीको लाभ उपलब्ध नहुने संभावना देखिएको छ ।

आयातमा कर घटेपछि युरोपका प्रख्यात ब्रान्ड फक्सवागन, रेनो, स्टेलान्टिस, औडी र बिएमडब्लु तथा मर्सिडिज बेन्ज जस्ता ब्रान्डले भारतीय बजारमा राम्रो उपस्थिती जनाउने अपेक्षा गरिएको छ । साथै, उनीहरूका लागि स्थानीय रूपमा उत्पादन गर्नुअघि आयातित सवारी साधनहरू बेचेर बजार परीक्षण गर्ने अवसर समेत प्राप्त हुनेछ ।