हेल्मेट एयरब्यागसहितको विलासी एमपीभी, हुवावे र चेरीको सहकार्यमा लक्जीड भी९ लन्च गर्ने तयारीमा

चिनियाँ प्रविधि कम्पनी हुवावे र अटोमोबाइल निर्माता चेरीले संयुक्त रूपमा विकास गरेको प्रिमियम एमपीभी लक्जीड भी९ चाँडै बजारमा आउने तयारीमा छ । हार्मोनी इन्टेलिजेन्ट मोबिलिटी एलायन्स अन्तर्गत विकसित यो गाडीले विलासिता, अत्याधुनिक प्रविधि र उच्च सुरक्षालाई एकैसाथ समेटेको छ। सो गाडी ठूलो परिवार तथा लामो दूरीको आरामदायी यात्रालाई ध्यानमा राखेर डिजाइन गरिएको छ ।

सो गाडीमा हुवावेले विकास गरेको ८००भी हाई भोल्टेज प्लेटफर्म प्रयोग गरिएको छ, जसले फास्ट चार्जिङ मात्र होइन, ऊर्जा खपतलाई पनि प्रभावकारी बनाउनेछ । साथै, १.५ लिटर पेट्रोल इन्जिनसहितको रेन्ज एक्सटेन्डर सिस्टमले ब्याट्री चार्ज गर्ने भएकाले एक पटक फुल चार्जमा सो गाडी करिब १२०० किलोमिटर दूरी तय गर्न सक्षम हुनेछ । यसमा कन्टेम्पररी एम्पेरेक्स टेक्नोलोजी लिमिटेडको टिकाउ र दीर्घायु ब्याट्री प्रयोग गरिएको छ।

लक्जीड भी९ ले नयाँ मापदण्ड स्थापित गर्ने दाबी गरिएको छ। यसमा पहिलो पटक हेल्मेट एयरब्याग सिस्टम समावेश गरिएको छ । दुर्घटनाको अवस्थामा सिस्टमले अटोमेटिक रूपमा सिटलाई सुरक्षित अवस्थामै सार्ने र एकैसाथ हेल्मेट एयरब्याग खुल्ने बताइएको छ । यसले यात्रुको टाउको र माथिल्लो शरीरलाई गम्भीर चोटपटकबाट जोगाउन मद्दत गर्छ । साथै, हुवावेको चियानकुन एडीएस स्मार्ट ड्राइभिङ सिस्टमले सडकका सम्भावित जोखिमहरू पहिचान गरी चालकलाई सहयोग गर्नेछ ।

गाडी ७ यात्रु अट्ने सो एमपीभीमा दोस्रो पङ्क्तिका क्याप्टेन सिट १८० डिग्रीसम्म घुमाउन मिल्छ । यसका साथै क्याबिनभित्र अक्सिजन जेनेरेटर, सानो रेफ्रिजरेटर, मल्टि स्क्रिन डिजिटल लेआउट र छतमा जडान गरिएको मनोरञ्जन डिस्प्ले जस्ता फिचर उपलब्ध छ । यसमा कम भौतिक बटन र बढी टचस्क्रिन प्रयोग गरिएको छ । यसमा हुवावेको हार्मोनीओएस सिस्टम समावेश छ, जसले स्मार्टफोन जस्तै सहज तरिकाले कारका विभिन्न फङ्सन कन्ट्रोल गर्न सकिनेछ ।

लक्जीड भी९ सन् २०२६ को पहिलो त्रैमासिकमा आधिकारिक रूपमा लन्च हुने अपेक्षा गरिएको छ। चिनियाँ बजारमा सो गाडीले  जिक्र ००९, ली अटो मेगा र भोयाह ड्रिमर जस्ता प्रिमियम इलेक्ट्रिक एमपीभीसँग प्रतिस्पर्धा गर्नेछ ।