भिनफास्ट भीएफ६ र भीएफ७ ले भारत एनक्यापबाट पाए ५ स्टार सेफ्टी रेटिङ

भिनफास्टका दुई इलेक्ट्रिक एसयूभी मोडल भीएफ६ र भीएफ७ ले भारत एनक्यापमा ५ स्टार मूल्याङ्कन प्राप्त गरेका छन् । दुबै मोडलले वयस्क यात्रु सुरक्षा र बाल यात्रु सुरक्षा दुवै श्रेणीमा उत्कृष्ट प्रदर्शन गर्दै शीर्ष रेटिङ हासिल गरेका हुन्।

भारत एनक्यापले सार्वजनिक गरेको विवरण अनुसार भीएफ६ ले वयस्क यात्रु सुरक्षामा ३२ मध्ये २७.१३ अंक र बाल यात्रु सुरक्षामा ४९ मध्ये ४४.४१ अंक प्राप्त गरेको छ। त्यस्तै भीएफ७ ले वयस्क यात्रु सुरक्षामा ३२ मध्ये २८.५४ अंक र बाल यात्रु सुरक्षामा ४९ मध्ये ४५.२५ अंक हासिल गरेको छ।

क्र्यास परीक्षणका क्रममा दुबै मोडलले फ्रन्टल, साइड र पोल इम्प्याक्ट परीक्षणमा उच्च स्तरको सुरक्षा प्रदर्शन गरेका छन्। भीएफ६ मा फ्रन्टल टक्करको अवस्थामा चालकको छाती क्षेत्रमा सुरक्षा स्तर केही कम देखिएको भए पनि समग्र प्रदर्शनका आधारमा यसले ५ स्टार मूल्याङ्कन कायम राख्न सफल भएको छ।

भीएफ६ र भीएफ७ दुबैमा ६ वटा एयरब्याग, एबीएस, ईबीडी, ईएसपी, ३६० डिग्री क्यामेरा र लेभल २ एडास प्रविधि समावेश गरिएको छ। यी दुबै मोडलले कम्प्याक्ट र मिड–साइज इलेक्ट्रिक एसयूभी सेग्मेन्टमा टाटा नेक्सन ईभी, टाटा कर्भ र महिन्द्रा एक्सयूभी४०० जस्ता मोडलसँग प्रतिस्पर्धा गर्नेछ।