८८.६ किलोमिटर लामो भरतपुर बृहत् चक्रपथ सञ्चालनमा

चितवन– देशकै सबैभन्दा लामो महानगरस्तरीय बृहत् चक्रपथ आज भरतपुरमा उद्घाटन गरिएको छ ।

भरतपुर महानगरपालिकाका प्रमुख रेणु दाहाल र उपप्रमुख चित्रसेन अधिकारीले भरतपुर–९ गोन्द्राङको जिरो किलोमिटरबाट चक्रपथको उद्घाटन गरेका हुन् । स्थानीय सरकार गठनपछि गौरवको आयोजनाका रूपमा अघि बढाइएको ८८ दशमलव ६ किलोमिटर लामो चक्रपथ निर्माण कार्य सात वर्षअघि सुरु गरिएको थियो ।

विभिन्न चरणमा सम्पन्न हुँदै आएको सडकको अधिकांश खण्डमा काम पूरा भइसकेको छ भने केही स्थानमा कालोपत्र र अलाइनमेन्ट मिलाउने काम बाँकी रहेको छ ।

संघीय, प्रदेश र स्थानीय सरकारको सहकार्यमा अरबौँ रुपैयाँको लगानीमा निर्माण गरिएको उक्त चक्रपथ अधिकांश स्थानमा पक्की भइसकेको बताइएको छ । केही स्थानमा व्यवस्थापनका काम बाँकी रहे पनि जनतालाई मर्का नपर्ने गरी सडक विस्तार गरिएको प्रमुख दाहालले बताइन् ।

आगामी दिनमा चक्रपथलाई दुई लेनमा स्तरोन्नति गर्ने योजना रहेको बताउँदै प्रमुख दाहालले भरतपुरमा भौतिक विकासले ठूलो फड्को मारेको दाबी गरिन् । हजारौँ किलोमिटर सडक कालोपत्र भइसकेको उल्लेख गर्दै अब सामाजिक विकास र रोजगारी सिर्जनालाई प्राथमिकता दिने उनले बताइन् ।

संघीय, प्रदेश र स्थानीय तहको लगानीमा निर्माण भएको उक्त चक्रपथको शिलान्यास २०७५ असार २९ गते तत्कालीन प्रधानमन्त्री पुष्पकमल दाहाल ‘प्रचण्ड’ले गरेका थिए । महानगरपालिकाका अनुसार चक्रपथ नारायणगढको पुलचोकबाट गोलाघाटसम्म पुग्नेछ भने गोन्द्राङ हुँदै पटिहानी–जगतपुर मार्ग भएर पुनः गोलाघाटमै जोडिनेछ । रासस