६ महिनपछि रसुवागढी नाका पुनः सञ्चालनमा

काठमाडौँ–बाढी र पहिरोका कारण बन्द रहेको उत्तरको छिमेकी चीनतर्फको प्रमुख व्यापारिक नाका रसुवागढी करीब ६ महीनापछि बिहीवार पुनः सञ्चालनमा आएको छ ।

गत असार २४ गते नेपाल–चीन सीमास्थित ल्हेन्देखोलामा आएको विनाशकारी बाढीले मितेरी पुल बगाएपछि यो नाका पूर्ण रूपमा ठप्प थियो ।

रसुवा भन्सार कार्यालयका अनुसार नाका सञ्चालनमा आएको पहिलो दिन (बिहीवार) २७ ओटा मालवाहक गाडी नेपाल भित्रिएका र २८ ओटा नेपाली रित्ता गाडी सामान लिन केरुङतर्फ प्रवेश गरेका छन् ।

बाढीका कारण क्षति पुगेको बन्दरगाह पनि यतिबेला सरसफाइ तथा अस्थायी रूपमा पुनर्निर्माण गरेर करीब २०० ओटासम्म गाडी पार्किङ गर्न मिल्ने बनाइएको छ । नेपाल र चीन सरकारबीच भएको सहमतिअनुसार चीन सरकारले यो बन्दरगाह अनुदान सहयोगमा निर्माण गरिदिनेछ ।