टाटा सिएरा ईभी संस्करणमा आउने

टाटा मोटर्सले मिड साइज एसयूभी टाटा सिएराको ईभी भेरिएन्ट छिट्टै बजारमा ल्याउने तयारी गरिरहेको छ । हालै कम्पनीले टाटा सिएराको पेट्रोल र डिजेल इन्जिनसहित लन्च गरिसकेको छ । यसमा दुई पेट्रोल र एक डिजेलसहित कुल तीन इन्जिन विकल्पहरू उपलब्ध छन् ।

कम्पनीले भविष्यमा अफ-रोडिङ क्षमतासहितको सिएरा संस्करण उपलब्ध गराउने संकेत दिएको छ, जसले विभिन्न प्रकारका सडक तथा अवस्था सहज रूपमा सामना गर्न मद्दत गर्नेछ। टाटाको भनाइअनुसार सो एसयूभी केवल आईसीई संस्करणमै सीमित रहने छैन, यसलाई ईभी भेरिएन्टमा पनि ल्याइने तयारी भइरहेको छ।

टाटा सिएरा ईभीमा ५५ किलोवाट र ६५ किलोवाट ब्याट्री प्याकको विकल्प हुने अनुमान गरिएको छ । साथै, एक पटक फुल चार्जमा सो एसयूभीले करिब ५०० किलोमिटरको रेन्ज प्रदान गर्ने अपेक्षा गरिएको छ । कम्पनीले यसमा रियर ह्विल ड्राइभका साथै अल ह्विल ड्राइभ विकल्प पनि उपलब्ध गराउन सक्ने सम्भावना व्यक्त गरिएको छ।

हालको लागि यसको मूल्यका विषयमा आधिकारिक रुपमा केही जानकारी सार्वजनिक गरिएको छैन । तर रिपोर्टका अनुसार टाटा सिएरा ईभीकाे मूल्य करिब १८ देखि १९ लाख भारुको बीचमा हुने अनुमान गरिएको छ। टाटाले यस सम्बन्धी विस्तृत जानकारी तथा आधिकारिक मूल्य भने लन्चको समयमा मात्रै खुलाउने जनाएको छ।