यामाहाले जापानमा ल्यायो नयाँ इलेक्ट्रिक स्कुटर ‘जोग ई’

यामाहा मोटरसाइकलले नयाँ यामाहा जोग ई इलेक्ट्रिक स्कुटर पेश गरेको छ। शहरी यात्राका लागि विशेष रूपमा डिजाइन गरिएको सो कम्प्याक्ट र किफायती स्कुटर अत्याधुनिक प्रविधि र फिचरले भरिपूर्ण छ।

यामाहा जोग ईको प्रमुख आकर्षण यसको स्वापेबल ब्याट्री सिस्टम हो । यसलाई होन्डा, सुजुकी, यामाहा र कावासाकीको सहकार्यमा विकसित गरिएको हो । स्कुटरमा १.५ किलोवाट आवर क्षमताको एक स्वापेबल ब्याट्री प्रयोग गरिएको छ, जसले फुल चार्जमा ५३ किलोमिटरसम्मको रेन्ज दिन्छ । जोग ईमा रहेको एसी सिंक्रोनस मोटरले २.३ पीएसको पावर र ९० एनएम टर्क दिन्छ ।

सो स्कुटरको लम्बाइ १७९५ एमएम, चौडाइ ६८० एमएम र उचाइ ११४० एमएम छ भने ह्विलबेस १३०० एमएमको छ । सो स्कुटरको तौल ९३ किलोग्राम रहेको छ ।  यसको अगाडि डिस्क र पछाडि ड्रम ब्रेकसहितको कम्बी-ब्रेक सिस्टम समावेश छ । साथै अगाडि टेलिस्कोपिक फोर्क र पछाडि ड्युअल शक एब्जर्बर रहेको छ ।

यसमा अल एलईडी लाइटिङ, पोलीगोनल हेडल्याम्प, गोलाकार मिरर, फ्ल्याट बडी प्यानल र तेर्सो टेलल्याम्प जडान गरिएको छ । साथै ५०० एमएलको फ्रन्ट युटिलिटी पकेट, यूएसबी टाइप–ए चार्जिङ पोर्ट, ठूलो हुक, सिटमुनि स्टोरेज र इनभर्टल एलसीडी इन्स्ट्रयुमेन्ट क्लस्टर उपलब्ध छ । यसमा तीनवटा राइडिङ मोड पनि प्रदान गरेको छ ।

यामाहा जोग ईको मूल्य जापानमा १ लाख ५९ हजार ५०० येन राखिएको छ । यसको ब्याट्री तथा स्वापिङ सेवाका लागि छुट्टै शुल्क तिर्नुपर्नेछ ।