भारतमा मारुति सुजुकीको ३ करोड कार बिक्री, अल्टो मात्रै ४७ लाख युनिट

मारुति सुजुकीले भारतमा कार उत्पादन थालेको ४२ वर्ष पुरा गरेको छ । यस अवधीमा कम्पनीले घरेलु बजारमा ३ करोड युनिट कार बिक्री गरेर नयाँ माइलस्टोन हाँसिल गरेको छ ।

सन् १९८३ मा आफ्नो पहिलो कार मारुती ८०० डेलिभरी गरेर यात्रा थालेको मारुतीले १ करोड युनिटको बिक्री हासिल गर्न थप २८ वर्ष २ महिना कुर्नु परेको थियो ।

कम्पनीले अर्को १ करोड युनिट केवल ७ वर्ष ५ महिनामा बिक्री गरेको थियो भने बाँकी १ करोड युनिट ६ वर्ष ४ महिनामा बिक्री गरेर नयाँ रेकर्ड कायम गरेको हो ।

३ करोड युनिटमध्ये, अल्टो ४७ लाख भन्दा बढि युनिटसहित सबैभन्दा धेरै बिक्री हुने मोडल बनेको छ । ३४ लाख युनिटभन्दा बढी बिक्रीका साथ वागन आर दोस्रो र ३२ लाख युनिटभन्दा बढी बिक्री हुँदै स्विफ्ट तेस्रो धेरै बिक्री हुने मेडल बनेका छन् । ब्रेजा र फ्रोन्क्स पनि ब्रान्डको पोर्टफोलियोमा सबैभन्दा लोकप्रिय मोडेलहरूको शीर्ष १० सूचीमा परेका छन् ।

‘३ करोड ग्राहकहरूले आफ्नो मोबिलिटीको सपना साकार पार्न मारुति सुजुकीमा विश्वास गरेका छन्, यसले मलाई विनम्रता र कृतज्ञताले भरिपूर्ण बनाउँछ’ मारुति सुजुकी इन्डिया लिमिटेडका प्रबन्ध निर्देशक तथा प्रमुख कार्यकारी अधिकृत हिसाशी ताकेउचीले भने ।