केवाईसीको नक्कली भर्सन ‘नियोसिया’ इलेक्ट्रिक भ्यान बिक्री रोक्न अदालतको आदेश

काठमाडौँ–उच्च अदालत पाटनले ‘नियोसिया’ ब्रान्डका विद्युतीय प्यासेन्जर भ्यान आयात र बिक्री नगर्न आदेश दिएको छ । ‘नियोसिया ब्रान्डका सवारी साधन आयात नगर्नू र यदि पहिले नै आयात भइसकेका छन् भने बिक्री वितरण समेत नगर्नू,’ अदालतले दिएको आदेशमा भनिएको छ ।

यसअघि गएको १५ साउनमा पाटन उच्च अदालतले सीजी मोटर्स बाहेक अन्य कुनै पनि कम्पनीलाई केवाईसी गाडी आयात नगर्न आदेश दिएको थियो । तर, उक्त आदेशलाई बेवास्ता गर्दै केवाईसी गाडीको नाम फेरेर ‘नियोसिया÷स्टार भी ईभी’ ब्रान्डमा सोही गाडी पुनः आयात गरिएको थियो ।

यसअन्तर्गत ‘इलेक्ट्रिक ड्रिम्स मोबिलिटी प्रालि’ नामक कम्पनी र त्यसकै सञ्चालकहरूले नयाँ कम्पनी ‘एम्बर मोटर्स प्रालि’ खडा गरी गाडी आयात गरिरहेको तथ्य बाहिरिएको थियो ।

केवाईसी ब्रान्डका गाडी नेपालमा सीजी मोटर्सले आधिकारिक रूपमा आयात गर्दै आएको छ भने देशभर बिक्री, सेवा र चार्जिङ नेटवर्क विस्तार गरिरहेको छ ।

केवाईसीको उत्पादक कम्पनी चोंगकुइंग चाइनाले पनि सोही गाडीको नाम ‘नियोसिया’ राखेको पुष्टि भएको छ । मोडेल, बनावट र फिचरहरू उही भए पनि नाम परिवर्तनले बौद्धिक सम्पत्ति अधिकार र अन्तरदेशीय व्यापार नियमनबारे नयाँ कानुनी प्रश्न उठाएको छ ।

अदालतको आदेशसँगै नियोसिया ब्रान्डका गाडी नेपालमा आयात वा बिक्री गर्ने प्रयास रोकिएको छ ।