अटो उद्योगमा चीनको नयाँ निर्णयपछि हलचल

विश्व अटो उद्योगमा चीनको नयाँ निर्णयपछि ठूलो हलचल मच्चिएको छ। चीन सरकारले रेयर अर्थ मेटल्स र तिनसँग सम्बन्धित प्रविधिको निर्यातमा कडा प्रतिबन्ध लगाउने घोषणा गरेपछि जर्मनी र इटलीका अटो कम्पनीहरू चिन्तित बनेका छन् । यी खनिजहरू इलेक्ट्रिक सवारीसाधन, सेमीकन्डक्टर चिप्स र हाई टेक प्रोडक्ट निर्माणका लागि अत्यावश्यक खनिज हुन्।

चीनको यो कदमले युरोपमा पहिले नै चलिरहेको कच्चा पदार्थको अभावलाई थप गम्भीर बनाउने सम्भावना देखिएको छ। जर्मनी र इटलीका प्रमुख अटो कम्पनीहरूले चेतावनी दिएका छन् कि यदि यस समस्याको शीघ्र समाधान नभए, तिनीहरूलाई उत्पादन गतिविधि नै रोक्नुपर्ने अवस्था आउन सक्छ।

चीनको वाणिज्य मन्त्रालयले हालै घोषणा गरेको नयाँ नीतिअनुसार अब रेयर अर्थ मेटल्स र तिनसँग सम्बन्धित प्रविधिको निर्यातमा नयाँ पाबन्दी लागू हुनेछ। यो निर्णय संवेदनशील र सैन्य क्षेत्रमा यी सामग्रीको दुरुपयोग रोक्नका लागि गरिएको चीनको भनाइ छ । यो कदम कुनै व्यापारिक द्वन्द्वको दबाबमा होइन, राष्ट्रिय सुरक्षाको दृष्टिले उठाइएको चीनले स्पष्ट रूपमा जनाएको छ ।

तर यो निर्णयले अन्तर्राष्ट्रिय व्यापार सम्बन्धमा थप तनाव ल्याउने देखिएको छ, विशेषगरी अमेरिकी पूर्वराष्ट्रपति डोनाल्ड ट्रम्पले चीनमाथि १०० प्रतिशत ट्यारिफको धम्की दिएपछि। यस घोषणाले विश्व बजारमा अनिश्चितता र प्रतिस्पर्धा दुवै बढाएको छ। जर्मनीको प्रमुख अटो उद्योग संस्था भीडीएले चीनको नयाँ नीतिको तीव्र विरोध गरेको छ । भीडीएले युरोपियन युनियन र जर्मन सरकारलाई चीनसँग यस विषयमा दृढतापूर्वक वार्ता गर्न आग्रह गरेको छ ।

अहिले विश्व अटो उद्योग चीनको निर्णयका कारण गम्भीर दबाबमा परेको छ। यदि चीनले आफ्नो नीति सहज बनाएन भने इलेक्ट्रिक सवारीसाधनदेखि उच्च प्रविधियुक्त उपकरणसम्मको उत्पादनमा ठूलो अवरोध सिर्जना हुन सक्ने विशेषज्ञहरूको चेतावनी छ।