टिप्स : बस र अन्य सवारी चालकले यसरी गर्नुस् सुरक्षात्मक उपाय

बस वा लामो दुरीमा चल्ने विभिन्न सवारी साधन चलाउँदा निकै नै होसियारीका साथ चलाउनु र विभिन्न पक्षहरुका वारेमा ध्यान दिनु आवश्यक हुन्छ । चाडपर्वको समयमा अझ धेरै यात्रुहरु हुने भएकाले धेरै यात्रुको सुरक्षा जिम्मेवारी पनि चालकमै हुन्छ ।

बस चलाउँदा आफू र साथमा रहेका अन्य यात्रुको जिम्मेवारी चालकको काँधमा हुने गर्छ । यो अत्यन्त जिम्मेवारीपूर्ण काम हो । सानोभन्दा सानो गल्तीले ठूलै दुर्घटना निम्त्याउन सक्छ । बस वा अन्य सवारी साधन चलाउँदा अपनाउनुपर्ने केही सावधानीका उपाय तल प्रस्तुत गरिएको छ :

निद्रा नपुगेको अवस्थामा गाडी नचलाउनुहोस्
पर्याप्त निद्राको अभावमा मानिसले थकानको अनुभव गर्छ । त्यस्तो अवस्थामा चालकले लिनुपर्ने पूर्ण सावधानी र चनाखोपनमा समेत ह्रास आउने हुन्छ । अझ लामो रुटका चालकले हरेक क्षण चनाखो हुनुपर्ने हुन्छ । निर्णय गर्दा सानो भूलले पनि ठूलो क्षति हुन सक्छ । स्फूर्तिलो अवस्थामा समेत गाह्रो मानिने यस्तो यात्रामा अझ निद्रा पूरा नभए जोखिम अत्यन्त बढी हुन्छ । तसर्थ, हरेक जिम्मेवार चालकले थकान भएको वा निद्रा नपुगेकोे अवस्थामा गाडी चलाउनुहुँदैन ।

कसैले गैरजिम्मेवारीपूर्ण तरीकाले चलाएको पाइएमा रिपोर्ट गर्नुहोस्
ट्राफिक नियमको उल्लङ्घन गर्ने र गैरजिम्मेवारीपूर्ण तरीकाले सवारी चलाउने चालकबारे उजुरी दिनु अन्य चालक तथा नागरिकको कर्तव्य हो । त्यस्तो चालकका कारण गाडीमा रहेका यात्रु, पैदल यात्रु तथा अन्य चालकका लागि समेत खतरा रहन्छ । त्यसैले कसैेले यसरी गैरजिम्मेवारीपूर्ण तरिकाले बस चलाएको पाइएमा ट्राफिक प्रहरीमा खबर गर्नुहोस् ।

अन्य सवारीसँग दूरी कायम राख्नुहोस्
दुई गाडीबीचको दूरी पर्याप्त हुनु आवश्यक छ । यसले आफ्नो अगाडिको गाडीले अचानक ब्रेक लगाएमा वा आफूलाई स्थान चाहिएमा पर्याप्त सुरक्षित स्थान बनाउन मद्दत पुग्छ । यसो गर्दा ठोक्किएर हुने दुर्घटनाबाट जोगिन सकिन्छ । पानी परेको वा वर्षाको मौसममा यो नियम अपनाउन अझ आवश्यक हुन्छ ।

ऐनाको प्रयोग गर्नुहोस्
गाडी चलाउनुपूर्व आफ्नो गाडीको ऐना ठीक अवस्थामा रहेकोमा निश्चिन्त हुनु आवश्यक छ । गाडी वरिपरि तथा पछाडिको दृश्य स्पष्ट देखिने गरी ऐना मिलाउनुपर्छ ।

लेन परिवर्तन गर्दा हतार नगर्नुहोस्
हरेकपटक लेन परिवर्तन गर्दा तपाई सम्भावित दुर्घटनासँग खेल्नु भएको हुन सक्छ । सिग्नल दिएलगत्तै लेन परिवर्तन गरिहाल्नु मूर्खता हो । मोड छुटिहालेमा अर्को मोडसम्म पुगेर मात्र मोड्न आवश्यक संयमता अपनाउनुहोस् । आफूले मोड्नुपूर्व अन्य चालकलाई त्यसको सङ्केत दिनुहोस् ।

सवारी ‘ब्याक’ गर्दा सावधान हुनुहोस्
गाडी ब्याक गर्दा सहचालक वा सहयोगी नदेखिएमा ब्याक नगर्नु राम्रो हुन्छ । सहचालकले दिएको सङ्केत राम्ररी बुझेपछि मात्र ब्याक गर्ने बानी बसाल्नुपर्छ ।

टायरवरपर तरल पदार्थ चुहिएमा गाडी नचलाउनुहोस्
टायर वरपर तरल पदार्थ चुहिएमा ब्रेक क्यापिलरी बिग्रिएको सङ्केत हुन सक्छ । यो बिग्रिएमा ब्रेक लगाउने क्षमतामा ह्रास आउने हुँदा दुर्घटनाको जोखिम रहन्छ ।

बालबालिकाहरू चढेको गाडी चलाउदा चनाखो हुनुहोस्
बालबालिकाहरू स्वभावैले चकचके हुने गर्छन् । त्यसैले, साना बालबालिकाले यात्रा गर्ने गाडीहरू जस्तै, स्कूल बस चलाउँदा अतिरिक्त सावधानी अपनाउनु आवश्यक छ । गाडीको झ्याल सकेसम्म बन्द राख्नु उपयुक्त हुन्छ । बालबालिकाहरूले नजानेर झ्यालबाट टाउको निकाल्न सक्छन् । यसो गर्दा दुर्घटना हुने सम्भावना बढ्छ । त्यसैले, तिनलाई यसो गर्नुबाट रोक्नुपर्छ ।

यात्रु झर्नेबित्तिकै गाडीको गति नबढाउनुहोस्
यात्रुले गाडीमा आफ्ना सामान भुलेका हुन सक्छन् । तिनलाई लिन, ओर्लेका यात्रु पुनः गाडीमा प्रवेश गर्ने सम्भावना रहन्छ । त्यसैले, यात्रु ओर्लिनेबित्तिकै गाडीलाई गति दिनु राम्रो होइन । यसो गर्दा दुर्घटनाको सम्भावना रहन्छ ।

आफ्नो रिस यात्रुमाथि नपोख्नुहोस्
आफ्नो व्यक्तिगत रिस वा समस्याका कारण गाडी उच्च गतिमा हाँक्ने चालकहरू पनि प्रशस्त छन् । यसका कारण चालकका साथै अन्य यात्रु दुर्घटनाको सिकार हुन सक्छन् । तसर्थ, यस्तो अवस्था रहँदा सकेसम्म गाडी नचलाउनु राम्रो हुन्छ । आफ्नो व्यक्तिगत समस्या र व्यावसायिक जीवनको मेल कहिल्यै गराउनुहुँदैन ।

आफ्नो सीटमा अतिरिक्त यात्रु नराख्नुहोस्
चालकको ध्यान गाडी र सडकमा केन्द्रित हुनु आवश्यक छ । चालकसँग गफ गर्दा वा सँगै यात्रा गर्दा तिनको ध्यान अन्यत्र मोडिन सक्छ । चालकको सिट नजिक यात्रु राख्नुहुँदैन । यात्रुले पनि सकेसम्म आफ्ना लागि निर्धारित सिट मात्र प्रयोग गर्नु आवश्यक छ ।

हुन्न भन्ने बानी बसाल्नुहोस्
वनभोज वा अन्य किसिमका यात्रामा सामान बोक्न गाह्रोका कारण यात्रुले अतिरिक्त दूरी पार गर्न आग्रह गर्न सक्छन् । कठिन बाटो वा आफूले चलाउन नजानेको र जान नसकिने बाटोमा नाई वा हुन्न भन्न डराउनुहुन्न । यसो गरी तपाईं यात्रु तथा आफ्नो सवारीलाई दुर्घटना हुनबाट जोगाउन सक्नुहुन्छ ।