ईभी आयात हुन थालेपछि कोरला भन्सारबाट दुई दिनमै उठ्यो २९ करोड राजस्व

काठमाडौं–हालै सञ्चालनमा आएको मुस्ताङको कोरला भन्सार कार्यालयबाट दुई दिनमै २९ करोड रुपैयाँ राजस्व संकलन भएको छ । नेपाल भन्सार स्वचालन प्रणाली (आशिकुडा) लागु भएपछि व्यावसायिक रूपमा सञ्चालनमा आएको यो भन्सारबाट बुधबार र बिहीबारमा मात्र २९ करोड रुपैयाँ राजस्व उठेको हो ।

रसुवा र तातोपानी भन्सार बाढीपहिरोका कारण बन्द भएकाले चीनतर्फबाट आउने इलेक्ट्रि भेइकल (ईभी) यसै नाकाबाट आयत हुन थालेका छन् । यो भन्सारबाट ईभी २२२ वटा आएका छन् । जसमा १५९ वटा जाँचपास भइसकेको छ ।

यो भन्सार असोज १ गतेबाट व्यावसायिक रूपमा सञ्चालनमा आएको हो । नेपाल राष्ट्र बैंकले भदौ ३१ गते मुस्ताङको कोरला भन्सारबाट सामान आयात गर्दा बैंकहरूलाई विनिमय गर्न स्वीकृति दिएको थियो ।

रसुवा भन्सार बन्द हुँदा यो भन्सारबाट सामान आयात बढेको छ । अहिले नै अत्यधिक चिसो भएकाले हिउँदमा यो नाका प्रयोग हुनेमा शंका छ । कोरला भन्सार छेउमा कुनै पनि होटेल छैनन् । व्यवसायी तथा कर्मचारी २–३ किलोमिटर तल झरेर बस्नुपर्ने बाध्यता छ ।

दसैँ नजिकिँदै गएकाले पनि चीनबाट सामान ल्याउने व्यापारीहरूले यो भन्सार प्रयोग गरिरहेका छन् । तर, कोरला बोडरबाट ५०० मिटर उता पुगेर व्यवसायीले सामान लोड गरेर ल्याउनुपर्ने बाध्यता छ ।