ईभी प्रवर्धनका लागि मन्त्री घिसिङले बनाए कार्यदल, नेपाललाई ईभी युगमा लैजाने घोषणा

काठमाडौं - उज्यालो अभियानका नायक मानिएका कुलमान घिसिङ हालै भौतिक पूर्वाधार तथा यातायात मन्त्रीमा नियुक्त भएका छन् । उर्जा मन्त्रालयको समेत जिम्मेवारी सम्हालेका घिसिङ पहिले देखि नै नेपालमा विद्युतबाट चल्ने सवारी साधन अर्थात ईभीको प्रवर्धनमा लागेको इतिहास भएका कारण उनीबाट धेरै अपेक्षा गरिएको छ ।

यसको सुरुवात समेत उनले पदभार ग्रहणकै समय देखि गरेका छन् । सोमबार पदभार ग्रहण गर्दै मन्त्री घिसिङले नेपाललाई ईभी युगमा लैजाने घोषणा समेत गरे । उनले विद्युतीय सवारी साधनको प्रवर्धन र चुनौती समाधानका उपाय बारे अध्ययन गर्न ५ सदस्यीय कार्यदल गठन गर्ने निर्णय समेत गरे ।

उनले मन्त्रालयका पूर्वाधार निर्माण तथा यातायात महाशाखा प्रमुखको संयोजकत्वमा कार्यदल गठन गरेका हुन् । समितिमा यातायात व्यवस्था विभागका महानिर्देशक, मन्त्रालयका कानुन उपसचिव, आन्तरिक व्यवस्थापन शाखाका उपसचिव र मेकानिकतर्फका सिनियर डिभिजनल इन्जिनियर सदस्य रहेका छन् ।

उक्त कार्यदललाई ७ दिन भित्र प्रतिवेदन बुझाउन भनिएको छ । कार्यदललाई विद्युतीय सवारी साधनको हालको अवस्था, विद्यमान नीति, कानुनी व्यवस्था लगायत बारेमा अध्ययन गर्नेछ । त्यस्तै, ईभीको प्रवर्धन गर्न नीतिगत, संस्थागत र आर्थिक पक्षमा सुधारका लागि सुझाव पेश गर्न, ईभीको गुणस्तर र मापदण्ड सिफारिस गर्न भनिएको छ ।

मन्त्री घिसिङले आगामी दिनमा इन्धनबाट चल्ने सवारीलाई विद्युतीय सवारीमा रुपान्तरण गर्नुपर्ने समेत बताए । नेपालमा हुने विद्युतको खपत बढाउनका लागि समेत यो आवश्यक भएका बताउदै उनले सवारी साधन र भान्सामा विद्युतको खपत बढ्यो भने धेरै कुराको समाधान हुने र यसका लागि आवश्यक पूर्वाधार भने बन्नु पर्ने बताए । ‘विद्युतीय सवारीसाधनको प्रयोगमा नेपाल विश्वमै टप कन्ट्रीमा पर्छ,’ मन्त्री घिसिङले भने, ‘अब सम्पूर्ण उद्योगधन्दा, कलकारखाना, रेल, मेट्रो र सवारीसाधन विद्युतबाटै चलाउनुपर्छ ।’ 

यसले पेट्रोलियम पदार्थको आयात घटाएर विदेशी मुद्रा बचाउनुका साथै सन् २०४५ सम्मको कार्बन न्युट्रल लक्ष्य प्राप्त गर्न मद्दत पुग्ने उनको भनाइ थियो ।

पदभार ग्रहणका क्रममा मन्त्रालयका सचिव केशवकुमार शर्माले मन्त्री घिसिङलाई मन्त्रालयको संगठनात्मक संरचना र हालका प्रमुख चुनौतीहरूबारे विस्तृत जानकारी गराएका थिए । हाल जेनजीको प्रदर्शनका कारण भौतिक पूर्वाधार तथा यातायात मन्त्रालय र मन्त्रालय अन्तर्गतका संरचनामा पुगेको क्षति र सडक पूर्वाधारमा बाढी पहिरोका कारण पुगेको क्षति मन्त्रालयको सबैभन्दा चुनौतीपूर्ण विषय भएको जानकारी गराएका थिए । 

तत्कालीन समयमा नेपाल विद्युत प्राधिकरणको कार्यकारी निर्देशक रहेको समयमा पनि विभिन्न कम्पनीले बिक्रीका लागि उपलब्ध गराएका सवारी साधनको वारेमा जानकारी लिन र यस्ता समारोहमा समेत उनको सहभागिता रहने गरेको थियो ।

नेपालमा हालै सम्पन्न जेनजी आन्दोलनबाट अटोमोबाइल व्यवासयमा केही क्षति पुगेको भए पनि अबका दिनमा केही नयाँ कार्य हुने अपेक्षा समेत व्यवसायीले गरेका छन् ।