चीनमा चार्जिङ युनिटको संख्या १ करोड ६७ लाख पुग्यो, मासिक विद्युत खपत कति ?

विश्वको सबैभन्दा ठूलो अटो बजार चीनले पछिल्लो समय विद्युतीय कार(ईभी) को बिक्रीमा निकै ठूलो फड्को मारेको छ । ईभी उत्पादनको हब बनिसकेको चीनले सवारीसाधनको बिक्रीसँगै यसका लागि आवश्यक पूर्वाधारकाे विकासमा समेत संसारलाई नै चकित पार्ने गरी काम गरिरहेको छ ।

ईभीका लागि अत्यावश्यक मानिने चार्जिङ पूर्वाधारमा चीनले अहिले विश्वका सबै देशलाई पछि पारेको छ । गत जुलाईको अन्त्यसम्म चीनले कुल १ करोड ६७ लाख चार्जिङ युनिट संचालनमा ल्याइसकेको छ । चार्जिङ पूर्वाधारकाे विकासमा चीनले हरेक वर्ष ५० प्रतिशतभन्दा बढीका दरले बृद्धि हासिल गरिरहेको छ भने सन् २०२० को तुलनामा १० गुणाले यस्ता नेटवर्क विस्तार भैसकेका छन् ।

चीनले यस वर्षको सात महिनामा मात्रै ३८ लाखभन्दा बढि चार्जिङ युनिट थपेको जनाइएको छ । जुन अघिल्लो वर्षको सोही अवधिको तुलनामा ९० प्रतिशतभन्दा बढी हो । यसरी सञ्चालनमा आएका चार्जिङ स्टेशनले हरेक महिना ७ अर्व ७१ करोड किलोवाट आवर विद्युत खपत गर्ने गरेको नेश्नल ईनर्जी एड्मिनेस्ट्रेसनका निर्देशक वाङ ह्वाङ्जीले बताए ।

चार्जिङ नेटवर्कको विस्तारमा चीनका १५ वटा कम्पनीले वर्चश्व कायम गरेका छन् । जसमा सबैभन्दा बढी टीएलईडीको मात्रै देशभर ८ लाख ७ हजार युनिट चार्जर छ भने दोस्रो धेरै स्टार चार्जले ७ लाख भन्दा बढी चार्जर जडान गरेका छन् ।

कम्पनीतर्फ सबैभन्दा धेरै निओको २८ हजार ६८१ युनिट चार्जर रहेको जनाइएको छ । निओपछि दोस्रो धेरै चार्जर राख्ने कम्पनीमा एलआई अटो रहेको छ । एलआई अटोले १५ हजार ६५५ युनिट चार्जर राख्दा टेस्लाको १४ हजार भन्दा बढी छ । त्यसैगरी, एक्सपेङको १२ हजार ३०० र जीकरको ८ हजार ४०० युनिट चार्जर रहेका छन् ।