राष्ट्रिय राजमार्गलाई समेट्ने गरी थप ४२४ वटा चार्जिङ स्टेशन निर्माण हुने

काठमाडौं–सरकारले विद्युतीय सवारीसाधनको बढ्दो प्रयोग र महत्वलाई ध्यानमा राख्दै ८० वटा राष्ट्रिय राजमार्गमा ४२४ चार्जिङ स्टेशन निर्माण गर्ने गुरुयोजनाको खाका तयार गरेको छ ।

नेपाल विद्युत् प्राधिकरणका अनुसार हाल निजीक्षेत्र समेतको गरी देशभर ४५० हाराहारी चार्जिङ स्टेशन स्थापना भएका छन् । अधिकांश शहरी क्षेत्रमा ती चार्जिङ स्टेशन रहेकोमा राजमार्गमा चाहिने चार्जिङको सन्दर्भमा अध्ययन गरी गुरुयोजना तयार पारिएको हो ।

जल तथा ऊर्जा आयोगको सचिवालयले हालै जारी गरेको गुरुयोजनाअनुसार नेपालका सम्पूर्ण राष्ट्रिय राजमार्गहरूको सञ्जाललाई समेटने गरी २५ देखि १०० किलोमिटरको उपयुक्त दूरीमा चार्जिङ स्टेशन राखिनेछ । प्रतिवेदनले सार्वजनिक निजी साझेदारी (पीपीपी) मोडल अन्तर्गत चार्जिङ स्टेशन निर्माण गर्न उपयुक्त हुने गुरुयोजनामा उल्लेख छ ।

ट्राफिक घनत्व, जमिनको उपलब्धता, बाढीको जोखिम, सडकको अवस्थाले विद्युतीय सवारीमाथि पार्ने प्रभाव र विद्युतीय ग्रीडहरूको पहुँच बिन्दुजस्ता पक्षलाई आधार मानेर करीब १४ हजार ९१३ किलोमिटर क्षेत्रमा चार्जिङ स्टेशन निर्माण गरिनेछ ।

नेपालको सडक यातायात प्रणालीको मेरूदण्डका रूपमा रहेका यी राजमार्गले प्रमुख शहरहरू, बजार क्षेत्रहरू, सीमा नाका र ग्रामीण बस्तीहरूलाई एकआपसमा जोड्ने काम गर्ने भएकाले यसले राष्ट्रिय आर्थिक विकास र क्षेत्रीय एकीकरणमा अत्यन्त महत्वपूर्ण भूमिका खेल्ने विश्वास लिइएको छ ।

पूर्व, पश्चिम उत्तर र दक्षिण सबैतिरका राष्ट्रिय राजमार्गको आवश्यकतालाई हेरेर चार्जिङ स्टेशन राख्ने प्रस्ताव गुरुयोजनामा राखिएको छ ।

नेपालले सन् २०३० भित्र दुईपांग्रेसहित सबै निजी गाडी बिक्रीको ९० प्रतिशत र चारपांग्रे बिक्रीको ६० प्रतिशत विद्युतीय पुर्याउने लक्ष्य लिएको छ । यो प्रतिबद्धता अन्तर्राष्ट्रिय मञ्चमै व्यक्त गरिएको हो ।