अपडेट भएर आयो टाटा पन्च ईभी, १५ मिनेट चार्ज गर्दा ९० किलोमिटर रेन्ज पाइने

टाटा मोटर्सले आफ्नो लोकप्रिय विद्युतीय एसयूभी पन्च ईभीलाई अपडेट गरेकोे छ । कम्पनीले नयाँ कलर अप्सन र छिटो चार्जिङ क्षमताका साथ पन्च ईभीलाई अपडेट गरेको हो ।

पन्च ईभीलाई अव १.२ सीको दरमा चार्ज गर्न सकिने कम्पनीले जनाएको छ । ५० किलोवाट डिसी फास्ट चार्जरले चार्ज गर्दा १५ मिनेटमै ९० किलोमिटर रेन्ज पाउन सकिन्छ । साथै, ब्याट्रीलाई केवल ४० मिनेटमै १० देखि ८० प्रतिशतसम्म चार्ज गर्न सकिन्छ । कम्पनीका अनुसार अपडेट लङ रेन्ज भेरिएन्टमा मात्रै गरिएको हो ।

यसवाहेक, टाटाले पन्च ईभीलाई थप दुई नयाँ कलर अप्सनमा समेत उपलब्ध गराएको छ । पन्च ईभी अव सुपरनोभा कपर र प्योर ग्रे कलरमा समेत उपलब्ध हुनेछ । सो कम्प्याक्ट एसयूभी यसअघि एम्पावर्ड अक्साइड, सीवीड, फियरलेस रेड, डेटोना ग्रे र प्रिस्टाइन ह्वाइट कलरमा उपलब्ध थियो ।

पन्च ईभी २५ किलोवाट आवर र ३५ किलोवाट आवर ब्याट्री प्याक अप्सनमा उपलब्ध रहँदै आएको छ । जसले एकपटकको फुल चार्जमा ३१५ र ४१२ किलोमिटर रेन्ज दिने दाबी गरिएको छ । दुबै भेरिएन्टमा ९० किलोवाट क्षमताको मोटर जडान गरिएको छ ।