टेस्लाको चालकविहीन कारको तयारी, परीक्षणका लागि कर्मचारी भर्ती सुरु

चालकविहीन कारको अवधारणा अब केवल चलचित्र वा भविष्यको कल्पनामा मात्र सीमित रहने छैन। विश्वका सबैभन्दा धनी व्यक्तिमध्ये एक एलोन मस्कको कम्पनी टेस्लाले यसलाई वास्तविकता बनाउने तयारी थालेको छ। कम्पनीले चालकविहीन कार विकासका लागि आवश्यक तयारी गर्दै परीक्षणमा सहयोग पुर्‍याउने कर्मचारीको भर्ती सुरु गरेको छ। यसले निकट भविष्यमा सडकमा चालकविहीन कार दौडिरहेको दृश्य देखिने सम्भावना बढाएको छ।

जागिर सूचीका अनुसार, यो पदलाई ‘सवारी साधन अपरेटर’ वा ‘अटोपाइलट’ भनिन्छ। यस पदमा छनोट भएका व्यक्तिहरूले लामो समयसम्म इन्जिनियरिङ सवारी साधन चलाउनु पर्नेछ। मुख्य काम भनेको परीक्षण र तालिमका लागि गतिशील अडियो तथा क्यामेरा डेटा सङ्कलन गर्नु हुनेछ। यो जागिर फ्लशिङ, क्वीन्स, न्यूयोर्कस्थित हुनेछ।

यद्यपि यो पद अटोनोमस ड्राइभिङ प्रविधिसँग सम्बन्धित भए पनि यसको अर्थ यो होइन कि न्यूयोर्कमा चाँडै रोबोट्याक्सी सेवा सुरु हुन्छ। हाल त्यहाँको कानुन अनुसार अटोनोमस सवारी साधनहरू केवल परीक्षणका लागि मात्र अनुमति प्राप्त छन्।

टेस्लाका सीईओ एलोन मस्कले विगतमा धेरैपटक आफ्नो कम्पनीले ठूलो मात्रामा चालकविहीन सवारी साधन लन्च गर्न सक्ने दाबी गरेका छन्। उनका अनुसार, टेस्लाले आफ्ना अवस्थित सवारी साधनहरूबाट सङ्कलन गरिएको डेटा प्रयोग गरी एआई प्रणालीलाई अझ सक्षम बनाइरहेको छ।