महिन्द्रालाई पछि पार्दै दोस्रो स्थानमा उक्लियो हुन्डाई, ४० प्रतिशत हिस्सा सहित सुजुकी अग्र स्थानमा

रिटेल सेल्समा हुन्डाई मोटर्सले महिन्द्रालाई पछि पारेको छ । गत महिना भारतमा बिक्री भएको कुल सवारीसाधनलाई आधार मान्दा यस्तो नतिजा देखिएको हो । सूचीको पहिलो स्थानमा भने ठूलो हिस्सा सहित मारुती सुजुकीको अग्रता कायमै छ ।

वाहनको तथ्याङ्क अनुसार, हुन्डाईले जुलाईमा ४२ हजार ६१ युनिट कार बिक्री गर्दै आफ्नो बजार हिस्सामा सुधार ल्याएको हो । हुन्डाईको बजार हिस्सा १२.९ प्रतिशतबाट बढेर १३.२ प्रतिशत पुगेको छ ।

सो अवधीमा महिन्द्राको ४१ हजार ४७६ युनिट कार बिक्री हुँदा बजार हिस्सा १४ प्रतिशतबाट घटेर १२.८ प्रतिशतमा झरेको छ । टाटा मोटर्सले ३९ हजार ७९५ युनिटसहित चौथो स्थान हाँसिल गरेको छ । उसको पनि बजार हिस्सा अघिल्लो महिनाको तुलनामा १२.३ प्रतिशतबाट घटेर ११.७ प्रतिशत कायम भएको छ ।

टोयोटाले २४ हजार ७७७ युनिट बिक्री रेकर्ड गर्दै पाँचौं स्थानमा रह्यो भने १ लाख २८ हजार ४२३ युनिट बिक्री सहित शिर्ष स्थान हाँसिल गर्यो । मारुती सुजुकी एक्लैको बजार हिस्सा ४० प्रतिशत भन्दा बढि छ ।