फर्च्युन ग्लोबलको सूचीमा पहिलो पटक टप १०० सूचीमा बीवाईडी, उक्लियो ९१ नम्बरमा

विश्व प्रसिद्ध चिनियाँ ईभी निर्माता कम्पनी बीवाईडी २०२५ फर्च्युन ग्लोबल ५०० लिस्ट अन्तर्गत ९१ नम्बरमा उक्लिएको छ । बीवाईडीले पहिलो पटक टप १०० भित्रैको सूचीमा परेर यो महत्वपूर्ण उपलब्धि हासिल गरेको हो ।

गत वर्ष बीवाईडी यो सूचीको १४३ नम्बरमा थियो भने त्यो भन्दा पहिलेको वर्ष २१२ नम्बरमा थियो । बीवाईडी लगातार यो सूचीमा महत्वपूर्ण उपलब्धि सहित अगाडि बढिरहेको छ । यस प्रकार यो सूचीमा बीवाईडी लगातार चौथो वर्ष रहन सफल भएको छ । त्यसैगरी अटोमोटिभ कम्पनी मध्ये बीवाईडीले तीव्र गतिमा वृद्धि भइरहेको कम्पनीको पहिचान समेत कायम गरेको छ ।

सन् २०२४ मा बीवाईडीले ४२ लाख ७० हजार न्यु इनर्जी भेइकल अर्थात एनईभी बिक्री गरेर नयाँ रेकर्ड कायम गरेको यिो । हाल विश्वका ११२ देशमा बीवाईडीका सवारी साधन बिक्री हुने गरेका छन् ।

ईभी बाहेक ब्लेड ब्याट्रीका लागि समेत बीवाईडी लोकप्रिय छ । सो ब्याट्री टेस्ला, बीएमडब्ल्यु, मर्सिडिज र आउडी जस्ता ग्लोबल अटो मेकरलाई समेत बीवाईडीले उपलब्ध गराइरहेको छ ।

नेपालमा समेत बीवाईडीका सवारी साधन उपलब्ध छन् । साइमेक्स इंकले बीवाईडीका सवारी साधन बिक्री–वितरण गरिरहेको छ ।

कुन कम्पनीको अवस्था के ?
बीवाईडीले यो सूचीमा पहिलो पटक टेस्लालाई पनि पछि पारेको छ । टेस्ला १०६ नम्बरमा रहेको छ ।

त्यसैगरी यो सूचीमा अन्य अटोमोबाइल कम्पनीहरु पनि रहेका छन् । सूचीमा फक्सवागन ग्रुप १५, टोयोटा मोटर १९, स्टेलान्टिस ३१ र जनरल मोटर्स ५० नम्बरमा रहेका छन् ।