टेस्ला गाडीमा सामसुङको चिप, दुई कम्पनीबिच भयो सम्झौता

विश्वका दुई टेक जायन्ट टेस्ला र सामसुङले एकआपसमा सहकार्य गर्ने भएका छन् । जसअन्तर्गन, टेस्लाले सामसुङ इलेक्ट्रोनिक्ससँग मिलेर चिप्स उत्पादन थाल्ने भएको हो । टेस्लाका सीईओ एलन मस्कले सामसुङसँग १६ अर्ब ५० करोड अमेरिकी डलरबराबरको डिल भएको जानकारी गराएका छन् ।

दक्षिण कोरियाली टेक जायन्ट सामसङले अमेरिकाको टेक्सस प्लान्टबाटै ए१६ चिप्स उत्पादन गर्नेछ । जसलाई टेस्लाले आफ्नो चालकरहित विद्युतीय गाडीहरूमा प्रयोग गर्नेछ । गाडीका अन्य स्वचालित प्रणाली र सेन्सरहरुमा पनि सामसुङले उत्पादन गर्ने चिप्स नै टेस्लाले प्रयोग गर्नेछ ।

टेस्लाको विद्युतीय गाडीका सेन्सर प्रणालीलगायतमा यो चिप प्रयोग हुँदै आएको छ । यो सम्झौतापछि भने प्लान्टबाट ‘नेक्स्ट जेनेरेसन ए१६’ चिप्स उत्पादन हुन लागेको छ । मस्ककाअनुसार ए१५ चिप्सको डिजाइन प्रक्रिया भर्खरै सकिएको छ र त्यसलाई टीएसएमसीले ताइवान र एरिजोनाबाट पनि उत्पादन थाल्दै छ ।