केन्द्रीय सरकारको व्यवस्थापन अन्तर्गत आयो चांगन अटोमोबाइल, पुँजी २.७५ अर्ब डलर

चांगन अटोमोबाइल ग्रुप आधिकारिक रूपमा चीनको केन्द्रीय सरकारको व्यवस्थापन अन्तर्गत आएको छ । अटो होमले रिपोर्ट गरेअनुसार, चांगन प्रत्यक्ष रूपमा नयाँ राज्य–स्वामित्वको उद्यमको रूपमा स्थापित भएको हो ।

कम्पनी जुलाई २७ मा २० अर्ब युआन (लगभग २.७५ अर्ब अमेरिकी डलर) पुँजीका साथ दर्ता भएको थियो । चांगन अटोमोबाइलका अध्यक्ष झु हुआरोङलाई नयाँ संस्थाको कानुनी प्रतिनिधिको रूपमा सूचीबद्ध गरिएको र कम्पनीलाई उनैले नेतृत्व गर्ने अपेक्षा गरिएको छ । चोङकिङमा मुख्यालय रहेको चांगन अन्तर्गत अटोमोबाइल र न्यु इनर्जी भेइकलको बिक्री तथा अटोमोटिभ कम्पोनेन्टहरुको अनुसन्धान र विकास समाबेश छ ।

चांगन अटो अन्तर्गत हाल दिपल, कियुआन, काइचेङ र अवतार लगायत ब्रान्डमा सवारीसाधन उत्पादन हुँदै आएका छन् । नयाँ समूहको स्थापनाको अवसरमा यी सबै ब्रान्डले संयुक्त रूपमा प्रचार सामग्रीहरू जारी गर्न थालेका छन् ।

‘नयाँ अभियान, नयाँ यात्रा’ नारा अन्तर्गत, पोस्टरहरूमा नयाँ समूह अन्तर्गतका ब्रान्डहरूको प्रतिनिधित्व गर्ने अवतार, दीपल, कियुआन, चांगन अटो र चांगन काइचेङलाई चित्रण गरिएको छ । २८ जुलाईको रात २०० अवतार ईभी चोङकिङ जियाङबेई अन्तर्राष्ट्रिय विमानस्थलमा नयाँ उद्यमको स्थापनाको उत्सव मनाउने सन्देशहरू सहितको प्रदर्शनमा तैनाथ गरिएको थियो ।

चांगन नेपाली बजारमा समेत उपलब्ध रहदै आएको अटोमोबाइल ब्रान्ड हो । यस ग्रुप अन्तर्गत उत्पादन हुने दिपल, अवतार र सोकोन जस्ता ब्रान्ड नेपाली ग्राहकको रोजाइमा पर्न थालेका छन् ।