कामाको नयाँ ईभी कन्टेनर बुक गर्नेलाई २ लाख छुट, नाडा अटो शोमा लन्च हुने

काठमाडौं–कामा ईभीको नेपालमा लागि आधिकारिक वितरक मेगा मोटर्सले आगामी नाडा अटो शोमा ईभी कन्टेनर लन्च गर्ने भएको छ । कम्पनीले अहिले यसको बुकिङ खुला गरिसकेको छ ।

जसअनुसार, यस ईभी बुकिङ गर्ने पहिलो ५० जना ग्राहकले २ लाख रुपैयाँ छुट पाउनेछन् । २७ लाख ९० हजार रुपैयाँ मूल्य तोकिएको यस कन्टेनर बुक गर्ने सुरुका ५० जना ग्राहकलाई २५ लाख ९० हजारमै उपलब्ध गराउने कम्पनीले जनाएको हो ।

फ्याक्ट्रिबाटै फिटिङ भएर आउने यस कन्टेनरले नेपालको मिनी कमर्सियल ईभी बजारमा नयाँ उपलब्धि हाँसिल गर्ने कम्पनीका प्रबन्ध निर्देशक महेश पालले बताए । ‘कामा ईडब्लु २ अहिले फ्याक्ट्रिबाट हिंडिसकेको छ । भदौ ३ गतेदेखी सुरु हुने नाडा अटो शोमा हामीले यसलाई लन्च गर्ने तयारी गरेका छौ । यो कमर्सियल ईभीले नेपाली बजारमा छिट्टै लोकप्रियता हाँसिल गर्नेमा ढुक्क छौ’ पालले भने ।

यस ईभीमा ८.५ फिट लम्बाई र ५.५ फिट उचाई भएको मजवुत कन्टेर राखिएको छ । यसको पेलोड क्षमता १.५ टन छ भने एकपटकको फुल चार्जमा २५० किलोमिटरसम्म गुडाउन सकिन्छ ।

कामा ईडब्लु २ मा ७० किलोवाट क्षमताको शक्तिशाली मोटर जडान गरिएको छ । कम्पनीले यस ईभीमा ५ वर्ष अर्थात २ लाख किलोमिटर वारेन्टि दिएको छ ।