भारतमा चर्चित बनेको एमजी विन्डसर ईभी अब नेपालमा, यस्तो छ मूल्य र फिचर

काठमाडौं – लामो समयको प्रतीक्षा पश्चात एमजीको नयाँ ईभी विन्डसर नेपाली बजारमा उपलब्ध भएको छ । एक कार्यक्रमका बिच नेपालका लागि एमजीको आधिकारिक वितरक पारामाउन्ट मोटर्सले एमजी विन्डसर ईभी लन्च गरेको छ ।

एमजी विन्डसरमा ३८ किलोवाट आवरको लिथियम आइरन फस्फेट ब्याट्री भएको स्टेबल म्याग्नेटिक सिंक्रोनस मोटर जडान गरिएको छ । सो मोटरले अधिकतम १३६ पीएस पावर र २०० एनएमको अधिकतम टर्क जेनेरेट गर्छ । फुल चार्जमा यसले ३३२ किलोमिटर रेन्ज दिने दाबी गरिएको छ । सो कारमा इको, इको प्लस, नर्मल र स्पोर्ट गरी चार ड्राइभिङ मोड रहेको छ ।

एमजी विन्डसरमा एलईडी लाइट, फ्लस डोर ह्यान्डल, १८ इन्चको अलोय ह्विल, एरो–लाउन्ज सिट, फ्रन्ट भेन्टिलेटेड सिट, वायरलेस एन्ड्रोइड अटो र एप्पल कारप्ले सहितको १५.६ इन्चको टचस्क्रिन इन्फोटेनमेन्ट सिस्टम, पीएम २.५ फिल्टर, पावर्ड टेलगेट र प्यानोरामिक सनरुफ जस्ता फिचर रहेको छ । कारमा कनेक्टिभिटीको लागि डिजिटल ब्लुटुथ पनि रहेको छ ।

एमजी विन्डसर ईभीमा भएको १५.६ इनचको टचस्क्रिन, ६०४ लिटरको बुट स्पेस, १३५ डिग्रीको एयरो लाउन्ज सिट, वायरलेस चार्जिङ र १८६ एमएमको ग्राउन्ड क्लियरेन्स लगायतका फिचरले धेरैलाई लोभ्याउने अनुमान गर्न सकिन्छ ।

नेपाली बजारमा दुई भेरिएन्टको एमजी विन्डसर ईभी बिक्रीका लागि उपलब्ध भएको छ । यसकाे मूल्य ३७ लाख ९९ हजार र ३९ लाख ९९ हजार रुपैयाँ निर्धारण गरिएको छ ।

भारतमा बुकिङ खुलेकाे २४ घण्टामै १५ हजार बुकिङ भएकाे, सबैभन्दा छिटाे ३० हजार युनिट बिक्री भएको र ७ महिना सम्म लगातार सबैभन्दा धेरै बिक्री हुने ईभीकाे रेकर्ड एमजी विन्डसरले कायम गरेकोे छ । अब नेपालमा यसकाे बजार कस्तो हुन्छ भन्ने प्रतीक्षा छ ।